Tenebrae Choir ella claustra a Glion

Quels dis sepresenta gl’ensemble engles Tenebrae Choir ella baselgia St. Martins-in-the-Fields a Londra. Lu viagia el sil continent per presentar il program «Winter’s House». El conta a Museum naziunal german a Nürnberg, lu cuntinuescha la turnea. In dils chors pli famus dil mund vegn dumengia proxima a Glion. Suenter ch’el ei staus gl’onn vargau l’emprema gada el Grischun, e quei a Cuera e Mustér, retuorna el dumengia proxima. Ella baselgia claustrala dallas soras dominicanas da Glion presenta el in concert da 70 minutas cul tetel «Winter’s House». Igl ei in viadi musical tras gl’advent e Nadal, ina cumbinaziun da musica chorala veglia e nova, da tuns enconuschents e vuschs contemporanas. Il concert unic includa era treis premaudiziuns da Flavio Bundi. Tenebrae conta, sut la direcziun da siu dirigent Nigel Short, las cumposiziuns «Neu unviern I», «Neiv e neiv» e «Neu unviern II». Gl’ensemble vocal, dirigius da Nigel Short, sedistingua sigl entir mund cun tuns caulds, profunditad e clarezia sonora. Tenebrae Choir vala sco in dils megliers dil mund e viagia da continent a continent per derasar il plascher dalla musica vocala. Entochen oz ha el produciu pli che 30 porta-tuns e gudignau gronds premis, sco il BBC Award, Gramophone Awards, Grammy. Cun precisiun nundetga ed intunaziun perfetga, sco era ina volumen sonor atmosferic, conta il chor cun sias 19 cantaduras e cantadurs. Gl’auditori astga selegrar sin ovras festivas e harmonias commuentontas.