Ün nouv büschmaint pella Butia Tarasp

La cooperativa Butia Tarasp exista daspö l’on 2006. 70 associadas ed associats han sgürà quella jada l’existenza da la butia davo cha la Lagrischa SA, la manadra dürant divers ons, vaiva decis da serrar l’affar. La Butia Tarasp es üna part indispensabla dal cumün. Ella proveda ad indigenas, seguondindigens e giasts cun artichels dal minchadi e cun prodots locals e regiunals. Integradas illa butia es eir la gestiun da l’uffizi postal e la sporta d’ün lö d’inscunter social.

La butia viva in prüma lingia da quels chi fan lur cumischiuns a Tarasp e garantischan ün surviver da quella sporta. Ella es impustüt eir il resultat da l’ingaschamaint instancabel dal persunal da vendita, dals commembers da la suprastanza da la cooperativa, da la gruppa da proget e da bleras persunas chi s’ingaschan a favur da la butia. In ün prüm pass s’ha integrà in november 2023 duos maisas da cafè illa butia ed eir adattà l’assortimaint ed il concept. Il chantun da cafè es bainvis. Cul possessur da l’edifizi, il cumün da Scuol, s’ha pudü sgürar üna relaziun da fittanza pels prossems desch ons.

Cumbinaziun da cafè e butia schlargiada

Davo chi’d es gnü investi illa cooperativa Butia Tarasp blera energia e schlantsch s’han ils respunsabels decis da far il prossem pass. Per realisar quel s’ha fat ün appel ad associadas ed associats, ma eir a tuot la populaziun e giasts fidels da sustgegner il proget finanzialmaing e l’appel ha gnü success. Il cumün s’ha partecipà cun 50 000 francs ed il rest es gnü da donaturs in möd cha la finanziaziun es garantida.

La cooperativa dombra actualmaing var 150 commembras e commembers. In collavuraziun culla firma d’architectura Arc-ana arch da Tarasp han ils respunsabels realisà il proget dals 9 fin als 30 da november. Riet Fanzun, manader da proget, ha orientà in dumengia davart la fabrica: «Dürant las trais eivnas da fabrica ha tuot funcziunà fich bain. Nus vaivan preparà tuot fich lönch ouravant minuziusamaing. Il falegnam ha fat sia lavur ouravant in möd chi s’ha be amo stuvü metter insembel ils divers elemaints. Nus vain lavurà cun mansterans indigens chi han prestà buna lavur ed eschan rivats a fin a temp.»

Festa da reavertüra

Donaturs ed associats sco eir la populaziun sun gnüts invidats in dumengia passada ad üna festa da reavertüra dal cafè/butia cun ün aperitiv e mangiativas. Ils preschaints e las preschaintas s’han pudü atschertar da la reuschida da la cumbinaziun da cafè e butia schlargiada. Il bivgnaint da la festa ha dat la presidenta da la suprastanza da la cooperativa Butia Tarasp, Cornelia Koch: «I m’es ün grond plaschair da das-chair salüdar a Vus tuots a la reavertüra da nos cafè/butia. Quist di muossa che chi’s po ragiundscher insembel, schi’s craja vi dad ün’idea. Blerischems han contribui a la reuschida da quist proget. Cul proget cafè/butia speraina da pudair augmentar e rinforzar la rendabilità da nossa butia cun cafè chi dess esser ün lö d’inscunter per nus tuots e tuottas». Eir il capo da Scuol Aita Zanetti ha drizzà ün pêr pleds als preschaints. Ella ha portà il salüd da la suprastanza cumünala ed ha ingrazchà per la reuschida e giavüschà tuot il bun.