20avla Dumengia da praulas

Gl’advent gaudan oravontut famiglias cun affons. Ei vegn fatg biscuits, ins decorescha la casa ni la habitaziun, ora ellas vias glischan cazzolas. Duront quei temps ei l’atmosfera semplamein autra, pli festiva. A quei dat la gruppa dil comite „Ilanzer Märchenstadt“ peisa. A Glion dat ei dumengia proxima puspei massa pusseivladads pils pigns. La 20avla gada organisescha ina gruppa da Glion la „Dumengia da praulas“. Mintgamai la secunda dumengia d’advent sveglia quella l’attenziun sur la regiun ora. Tedlar praulas e historias en quella e tschella casa ei l’attracziun principala. Igl ei in suentermiezgi ch’ins vesa a Glion massa famiglias. Geniturs san ir cun lur pigns ellas casas ch’ins viseta schiglioc buc. Per exempel en casa-cumin. Leu diverta il striun Shorini, el Museum Regiunal ei la stiva da caffè, ella biblioteca ei kino cun popcorn e della Casa Pfister prelegian Erica ed Uolf dalla miracla da Nadal ed autras historias romontschas. En differentas autras casas san ils affons tedlar praulas e historias. Il „Marcauet da praulas“ respectiv la „Dumengia da praulas“ a Glion ei pusseivels mintg’onn grazia ad ina roscha sponsurs e gidonters che sustegnan l’occurrenza da famiglia.