Carmalar dapli glieud sil binari

La cussegliera guvernativa Carmelia Maissen ha fatg attent alla conferenza da pressa dalla gievgia vargada a Glion che la Surselva profitescha quella ga il pli fetg dallas midadas digl urari. «E per quei motiv essan nus cheu a Glion.» La gronda midada ei il tact da mes’ura che la Viafier retica introducescha da Cuera entochen Glion ed alternont cul bus entochen Dieni. «Las experienzas en auters intschess grischuns muossan ch’il tact da mes’ura vegn appreziaus dalla populaziun indigena e dils hosps da vacanzas.» La cussegliera guvernativa ha fatg attent ad in vegl giavisch grischun per in tact da mes’ura dil tren da Turitg a Cuera. In giavisch ch’ei secumplenius e che lubescha da cuntinuar cun la Viafier retica el medem ritmus entochen Glion. «Cun quella nova purschida sa il traffic public senz’auter concurrenzar cul traffic sin via.» La cussegliera guvernativa ha fatg attent allas stentas actualas dalla politica federala da strihar daners a favur da viafier ed auto da posta. La megliera risposta sin quellas stentas da spargnar ha Carmelia Maissen gest formulau sezza: «Fagei stedi diever dil tren e digl auto da posta.»

Diversas sfidas

Il directur dalla Viafier retica, Renato Fasciati ha getg ch’adina dapli persunas sesien els trens dalla Viafier retica. «Nus essan la viafier en Svizra cun il pli grond augment da passagiers.» Il directur dalla Viafier retica ha denton era discurriu dallas pretensiuns che l’introducziun dil tact da mes’ura en Surselva porta sin in tschancun cun sulet in binari. «Cun rinforzar il binari savein nus tscheu e leu augmentar la spertadad dil tren.» Il avantatg principalmein per il viadi tras la Ruinaulta porta la sanaziun dalla staziun da Versomi. Cu la staziun vegn adattada, ei denton aunc buc enconuschent. Renato Fasciati ei cunscients che las staziuns ella Ruinaulta san buca tuttas profitar dallas novas colligiaziuns. «Il status quo vegnin nus denton da tener.» E sco quei ch’il directur dalla Viafier retica ha dau d’entellir cruschan ils trens a partir da miez december buca pli alla staziun da Castrisch, mobein a Glion. «Quei porta gronds avantatgs als autos da posta che partan ed arrivan a Glion.»

Stentas da recrutar persunal

Presentau las novas purschidas dil survetsch autopostal en Surselva ha Christian Kindschi, responsabels tier l’interpresa Auto da Posta per ils contacts cun la clientella. Viers la FMR ha Christian Kindischi era plidentau las continuadas stentas dalla interpresa da recrutar manischunzas e manischunzs. «Nus essan en concurrenza cun biaras branschas ch’enqueran persunal dil fatg.»

Werner Schurter ei medemamein buca vegnius cun mauns vits a Glion. Il responsabel tier las Viasfier federalas svizras (VFF) per la Regiun Ost e la S-Bahn ha surdau a Carmelia Maissen in mini «Böög» per far gust sil proxim «Sechseläuten» a Turitg nua ch’il Grischun ei hosp d’honur. Mo era las novas che Werner Schurter ha purtau a Glion paran dad esser positivas per la Surselva e per il Grischun. Denter auter ha el annunziau che la Viafier federala vegli cuntinuar cun l’emprova dad installar ina colligiaziun directa dalla Part sura turitgesa entochen Cuera e quei duront la sesiun da stad e d’unviern.

Bus Ostschweiz fetga pei en Surselva

Ils bus mellens digl Auto da Posta s’audan gia dapi decennis tiel maletg dalla cuntrada sursilvana. Ed a partir dils 14 da december 2025 ein quels bus mellens aunc pli stedi sin via. La purschida dil traffic public vegn econuschentamein slargada sin la proxima midada digl urari da miez december. Ina pintga part dalla petta dil traffic public en Surselva segirescha da niev l’interpresa Bus Ostschweiz, activa per gronda part entochen uss egl intschess denter il Lag da Constanza ed il Lag Rivaun. Uss expandescha quella interpresa dil traffic public el Grischun e cun ina pintga purschida era en Surselva. Bus Ostschweiz ha sco ei para fatg la megliera offerta alla Viafier retica per surprender la colligiaziun dalla damaun baul da Dieni a Glion e treis colligiaziuns dalla sera tard da Glion a Dieni. E sco quei ch’ins ha udiu agl ur dalla conferenza da pressa a Glion ei quei buc il sulet tschancun digl Auto da Posta el cantun Grischun che vegn survius da niev dils autos blau-alvs da Bus Ostschweiz. (fmr/ac)