In ulteriur interessant program

TujetschVivaCultura ei ina purschida d’arranschaments d’informaziun e divertiment organisada communablamein dil Forum cultural Tujetsch, il Museum La Truaisch e la Cuminonza dallas possessuras e dils possessurs da secundas habitaziuns da Tujetsch. Il program annual ei sesviluppaus ils davos onns ad ina purschida essenziala d’interessants arranschaments ella Val Tujetsch e per part suls cunfins da quella ora. Il program pigl onn 2026 ch’ei cumparius quels dis en fuorma d’in flyer ei danovamein fetg varionts ed envidonts.

Interessanta purschida

Il responsabel per la purschida da TujetschVivaCultura, Tarcisi Hendry, ei perschuadius: «Il program da TujetschVivaCultura ei nudaus ell’agenda da biaras Tuatschinas e biars Tuatschins, mo era tier possessuras e possessurs da secundas habitaziuns.» Quei fa buca surstar, pertgei ils programs dils davos onns ein stai fetg attractivs e carmalonts e quel pigl onn 2026 dat ella medema crena. El cumpeglia attractivs referats da persunas bein enconuschentas, excursiuns e spassegiadas tematicas, mo era caschuns da guder e discutar communablamein per exempel cun films ni tier exposiziuns.

L’entschatta dil program vegn fatga sonda, ils 3 da schaner 2026 cun in referat dil geolog Adrian Pfiffner davart eveniments natirals extrems en Svizra. Il fevrer ei Simon Bundi en roda cun siu referat davart 100 onns automobilitad el Grischun ed il mars referescha il historicher Jon Mathieu davart ils bulius ella moderna. Terminaus vegn il program il november cun ina prelecziun da Gion Battesta Manetsch davart Mumpé Medel – ils Gualsers e lur historia. Il flyer fa era attents sils concerts el rom dalla retscha «Buna sera Tujetsch» che han liug el Hotel Mountain Lodge, il Hotel Krüzli ni la Grünbär. Ils termins da quels vegnan communicai successivamein, in ei denton gia fixaus: Ils 27 da december 2026 concerteschan Pascal Gamboni e Severin Brugger.

2025 cun 870 interessai

Igl onn 2025 han 870 persunas visitau ina dallas 18 occurrenzas da TujetschVivaCultura. «Danovamein havein nus saviu far l’experientscha con vivs, marveglius e colligiai ch’ils indigens e hosps ein culla natira, la historia e la cultura dalla Val Tujetsch», constatescha Tarcisi Hendry che tila ina bilanza positiva dil program: «Tschun referats ella Sala Cristalla, quater excursiuns tematicas sco era pliras sentupadas culturalas han formau il program annual. Dall’architectura e mistregn alla cultura viva d’unviern e dil tscheiver entochen agl art, musica, film, historia e la geologia. Mintga occurrenza ha prestau sia contribuziun per in onn cultural e multifar.»

Eveniments tut specials seigien stai l’avertura dil niev archiv cultural, la sentupada dils vischins da Tujetsch, Medel e Mustér a Stagias, la spassegiada geologica a Nalps e culturhistorica a Rueras. Mo lu era il di dil museum ed archiv, la FotograVia 2025, sco era l’investa ella historia da nossas vals e vitgs dalla vart seniastra ed ella pissiun dil cavar cristallas.