«Ina campagna electorala è in maraton – in lung maraton»
La PPS dal Grischun va cun Valérie Favre Accola en il cumbat electoral per l’elecziun da la Regenza ch’è l’auter onn. A la radunanza da nominaziun da la PPS da gievgia a Cuira ha Valérie Favre Accola retschavì 170 da las 223 vuschs valaivlas.
La vicepresidenta da Tavau e presidenta dal Cussegl grond, Valérie Favre Accola (52), va en il cumbat electoral per la regenza grischuna. A la radunanza da nominaziun da gievgia saira en il Marsöl a Cuira han las commembras ed ils commembers da la PPS dal Grischun decis quai cun 170 da 225 vuschs. Sco che la partida aveva communitgà oravant steva er il president da la fracziun en il Cussegl grond, Walter Grass (51) a disposiziun. Lez ha retschavì cun 50 cleramain damain vuschs che Favre Accola. Pir la saira da nominaziun è Hans Vetsch anc sa mess a disposiziun. El ha survegnì mo trais vuschs.
Mo cun in ticket – ma cun ina dunna
Sco ch’il pledader da la PPS, Jann Thöny, aveva ditg gia avant la radunanza da nominaziun envers RTR saja la strategia dad ir cun in unic ticket, pia mo cun in candidat u ina candidata a las elecziuns 2026. Quella candidata è ussa damai Valérie Favre Accola. La deputada da Tavau è uschia ina da pliras dunnas che van en la cursa per la successiun da cusseglier guvernativ Jon Domenic Parolini (guarda boxa).
Valérie Favre Accola è naschida a Friburg e creschida si a Tavau. Ella è dapi l’onn 2018 deputada dal Cussegl grond. Dapi il cumenzament dal 2025 è ella vicepresidenta (commembra Kleiner Landrat) da la vischnanca da Tavau. Ella s’engascha per il svilup da la nova generaziun en il sport ed era per il svilup da las singulas vischnancas e regiuns en il Grischun. Plinavant è ella actualmain la pli auta Grischuna, sco presidenta dal Cussegl grond. Valérie Favre Accola è maridada cun l’anteriur skiunz Paul Accola ed è mamma da trais uffants.
RTR: Quant gronda è la surpraisa da Vossa nominaziun?
Valérie Favre Accola: La surpraisa è sa chapescha gronda. Sinceramain, jau n’avess betg spetgà in resultat uschè cler en la nominaziun. Jau sun era stada gnervusa questa saira. E tant pli gronds èn perquai uss il plaschair ed il gust da candidar.
Co vulessas Vus cuntanscher che la PPS reconquistia cun Vossa persuna in sez en la Regenza?
Jau vuless far quai exact cun quellas posiziuns, per las qualas jau ma sun engaschada politicamain durant tut quests davos onns. Jau represchent las valurs da la PPS, jau vuless cuntanscher bunas soluziuns ed jau emprov dad avair in dialog avert cun tut la populaziun – sur ils cunfins da las partidas ora.
Quatter giadas ha la PPS empruvà ils davos onns da gudagnar in sez en la regenza grischuna – senza success. Ussa suonda la proxima tentativa, ussa cun ina dunna?
Er ina candidatura dad ina dunna n’è nagina garanzia per propi recaltgar in sez en la Regenza per nossa partida. Da quai ma sun jau conscienta. Quai che ha però midà – dapi las davosas elecziuns chantunalas – è che nossa partida ha en il fratemp gudagnà fermezza tar votantas e votants e ch’ella ha entant dapli deputadas e deputads en il Cussegl grond. Tenor nus fissi perquai pli che endretg dad avair in sez en la Regenza. Jau sper che jau possia ussa persvader votantas e votants grischuns da mia candidatura.
Da tge avais Vus respect durant ils proxims mais?
Jau ma sun conscienta ch’ina campagna electorala è in maraton – in lung maraton. I vegn a dar blera lavur e diversas sfidas, cun dis da lavur pli lungs e cun notgs pli curtas. Ma jau sun pronta dad ir en la campagna ed jau stun gugent a disposiziun per quai.
Èsi forsa in dischavantatg che tut las novas candidaturas èn dunnas?
Na, insumma betg. Anzi, jau sun perfin loscha che nus avain per il mument en il Grischun dapli candidaturas da dunnas che dad umens, quai è bain istoric. Cun Nora Saratz-Cazin, Aita Zanetti, Carmelia Maissen e cun mai avain nus uss ina maioritad da candidaturas femininas, sper ils trais candidats ch’èn en uffizi.
Ma bleras candidaturas vegnan questa giada or da regiuns turisticas.
Quai na vuless jau betg laschar star mo uschia. Tavau è in ferm spazi economic en general, nua ch’il turissem è sa chapescha impurtant, ma Tavau è er in impurtant lieu da scienza e furmaziun. Ma quest spazi economic da Tavau n’ha dapi passa 50 onns betg pli gì in sez en la regenza grischuna. Gia mo quel fatg è ina buna raschun per dar in sez a quella regiun. Per cumparegliar: La vischnanca da Scuol è ussa represchentada dapi prest 12 onns cun Jon Domenic Parolini en la Regenza e vuless uss anc ina giada succeder.
Cun tge tematicas vulessas Vus ussa persvader en la campagna?
Cun mia candidatura vuless jau propi persvader en l’entir chantun Grischun – e cun tuttas tematicas. Questa saira a la radunanzas da nominaziun da la PPS èsi vegnì menziunà che era l’agricultura dovria puspè ina ferma vusch en la Regenza. Era quai vuless jau metter en vista cun mia candidatura e cun tut mias experientschas che jau hai rimnà er en quel sectur.
Pliras candidaturas per ils tschintg sezs
Las elecziuns da la Regenza èn ils 14 da zercladur 2026. D’occupar da nov è in sez, numnadamain quel dal cusseglier guvernativ Jon Domenic Parolini (AdC) che na candidescha betg pli pervi da limitaziun da l’uffizi. D’eleger u reeleger èn cusseglieras u cussegliers guvernativs per tut ils tschintg posts en la regenza grischuna. Sper la PPS sa mettan anc autras candidaturas en ils stadals.
ll Center ha actualmain trais sezs en l’executiva e vul defender quels. Sper ils cussegliers en uffizi Marcus Caduff e Carmelia Maissen porta la partida Aita Zanetti, capo da Scuol, sco terza candidata che duai defender il sez da Jon Domenic Parolini.
La Partida socialdemocratica (PS) ha annunzià che ses cusseglier guvernativ en uffizi Peter Peyer candidescha per in’ulteriura perioda d’uffizi. Sch’i dat anc ina segunda candidatura da la PS vegn actualmain anc discutà.
La medema situaziun sa preschenta tar la Partida liberaldemocratica dal Grischun. A disposiziun per in’ulteriura perioda stat il cusseglier guvernativ en uffizi Martin Bühler. Sch’i dat anc ina segunda candidatura, decida la partida il schaner 2026.
Plinavant ha la Partida verd-liberala grischuna nominà Nora Saratz Cazin uffizialmain sco candidata per la regenza grischuna. La presidenta communala da Puntraschigna candidescha per recaltgar l’emprim sez insumma per la Partida verd-liberala en la regenza grischuna. (rtr/fmr)
Gust da leger dapli?