Emprender d’ina vaira campiunessa

Vulessas Vus savair dar troccas sco ina campiunessa? Jau bain. Ma per gliez dovri bler exercizi. Ins stuess pudair dar mintg’emna. Lezza chaschun n’hai jau deplorablamain betg. En pli ston ins enconuscher ils trics e rampigns. E tgi fiss pli adattà per mussar gliez ch’ina vaira capo-trochista? Ina tala è Renata Cathomas-Beer che ha ­gudagnà gia plirs turniers da troccas.

Il 2019 ha RTR fatg in grondius servetsch a trochists ambizius e trochistas passiunadas – numnadamain registrà ina retscha da filmins cun la capo-campiunessa. In filmin dura mintgamai be ina u duas minutas. En mintga filmin declera Renata Cathomas in auter tric.

Cura èsi inditgà da dar il nar? Pertge n’èsi betg prudent da far chatscha sin il bagat? Pertge duess ins tschantschar vair e betg memia flaivel per forsa manar en era l’adversari? Co profiteschan ins d’ina colur lunga? Cura pomai tschentan ins ina trocca gia a l’entschatta dal gieu? Ed il grond art dal dar troccas: Co fan ins puncts cun sgurtegiar?

Igl è grondius da pudair guardar questa retscha cun quests cussegls. Jau mezza hai scuvert ils filmins pir dacurt e sun stada uschè intgantada, ch’jau hai gist guardà trais giadas in suenter l’auter tut ils filmins. Renata Cathomas n’è numnadamain betg mo ina trochista da vaglia, mabain er ina grondiusa entruidadra en il mund ed en l’art da dar troccas.

Ils filmins cun ils tips e rampigns da Renata Cathomas chattais Vus cun scannar il code QR.