Engles han cantau romontsch

Allas 350 persunas che han profitau dalla caschun e che han visitau il concert ha gl’ensemble purtau in schenghetg: 15 canzuns cul tetel «In Winters’s House». Duront 70 minutas ha gl’auditori gizzau las ureglias. Senza interrupziun d’applaus han ils presents astgau guder polifonia perfetga, vuschs lomas, unitad e clarezia da tuns. Denter las 15 cumposiziuns da differents stils ha Tenebrae surpriu gl’auditori cun treis ovras da Flavio Bundi. Il chor da combra sut la direcziun da Nigel Short ha interpretau en romontsch «Neu unviern I», «Neiv e neiv» e «Neu unviern II» tenor duas poesias da Victor Durschei (*1957). Gl’auditori – biaras e biars da lungatg romontsch – ha smarvegliau, pertgei il chor engles ha cantau cun ina articulaziun ch’ins ha capiu mintga plaid.