Fiera d’advent sen la pùnt len

La pùnt viglia e ornada cun glischs da Nadal a sumeglia egna stiva privada. Igl e egn’atmosfera digl tutafatg unica, amplanida da la savur da vegn tgòld a hotdogs frestgs.

Puloverets ad otras creaziùns

Da la partida schon da blears ons annà e la Manuela Michael dad Andeer, possessura da la stizùn La Trucla. Ella venda egna grànda variaziùn da tutas sorts artetgels – tuts fatgs â màn. Da canasters fatgs cugl croc a candeletas, tocen tier tgartas, ad ànc blear oter e’gl da catar agl sieus sortimaint. Atgnas creaziùns fa ella schon passa 30 ons. Antschiet veva tut cun lavurs da pulpier. Egn moto dad ella e dantànt c’igls materials vegian dad ir cugl tains. Ascheia en ear da catar lavurs da len fatgas a màn ad angravadas cun laser. A l’amparada, tge ca segi par ella la ple grànda motivaziùn da sapartizipar mintg’on a la fiera, raspunda ella: «Igl fa grànd plascher da vaser mintg’on igl grànd diember da visitaders a visitadras.»

Dus stands ple lientsch fa vanal la Ruth Rudin lavurs cusidas a màn, puloverets, mintgegn cun egn agen motiv, cusieu dad ella. Ear ella e schon da blears ons annà da la partida. Igls sieus balteztgas unicats par unfànts pintgs cun diferaints maletgs en fetg dumandos. Ascheia e ànc mintgatànt d’antupar an la val egn unfànt cun egna da las sias creaziùns, egna tgossa ca fetschi ad ella grànd plascher.

Ple ca me egna fiera

La fiera da Nadal d’Andeer e dantànt ple ca me egn liac da vender a cumprar – ella e egn liac par catar cuminànza par mintgegna a mintgegn. La localitad speziala, sen la pùnt len, aintamiez la vischnànca, dat caschùn a blearas santupadas a dascurs – ign sa strusch ir dus pass sainza scuntrar ancunaschaintas ad ancunaschaints. Egn aspect e fetg impurtànt: La fiera porscha egn’ocasiùn par vender a cumprar products locals – ascheia vean sustanida la producziùn locala. A par anqualegn visitader ad anqualegna visitadra e quegl egna pussevladad da cumprar ànc l’egn near l’oter tschincetg da Nadal.