Igls «radis da sprànza» da Pignia

Igl clavo da la Stini Arn e igl numer tres sen la glista da las faneastras d’advent d’Andeer. Parquegl e vagnida avierta l’exposiziùn da las tres artisanas gest igls tres da dezember, agl clavo digl tat Giovanni Grischott ca la bieadia Stini Arn â transfurmo an egn atelier da tesser a sala d’exposiziùn, suainter c’ella e turnada d’egna dimora agl Mali.

Egn «cuntrapunct agls ambrugls»

Las ovras da las tres artistas Stini Arn, Esther Grischott a Christine Flaig den easser «radis da sprànza», quegl c’e daple ca me igl tetel da la mustra. «I dovra radis da sprànza an que tains da desperaziùn», gi Stini Arn, manzunànd igls conflicts actuals dapartut segl mund, mo an spezial agl Mali, noua c’ella â vivieu durànt egn dezeni a ca vean ussa ambruglieu da terorists. Cun lur exposiziùn tschaintan ellas egn cuntrapunct a quels ambrugls. Lur ovras agl nuvegl an spira glischur da glischs den darasar plascher a legreia agls visitaders. Stini Arn expona telas fatgas agl atelier da tesser a Bamako c’ella veva inizio igls 2015 a pigl qual ella sacumbregia ànc adigna, sper igls sieus pensum parzial da surmestra da lavurs manilas.

Las telas an melen, ner ad alv en fatgas a màn cun la tecnica da calurar «bogolan». «Bog» mùnti teara, gi Stini Arm. Las telas vignian tainschidas cun calurs da plàntas ad alura bugneadas pliras geadas an belma da teara. Otras telas mussan musters caluros. Quellas en fatgas cun la tecnica dad «ikat». Quegl mùnta c’igls fils digl urgiamaint vignan caluros liànd els avànt ca bugnear an la calur. Ascheia resulteschan telas cun musters giagls an furma da ziczac. Cun quellas â ella fatg scussals a tajas par plimatschs.

Fietrar e la sia passiùn

La mussadra Esther Grischott e ancunaschainta pigls seas objects da fieter. Da fietrar â ella amprieu avànt biabagn 30 ons an egn curs da l’Uniùn da las dunas. D’alura annà â ella saperfecziuno sen que tgomp, â aviert egn atelier da fietrar ad Andeer ad e dantànt davantada instructura par la «Szena da fietradras svizras», par la quala ella dat curs a scolaziùns. «Mo propi la mia passiùn e’gl da fietrar tgapealas a tastgas», palainta Esther Grischott. An l’exposiziùn a Pignia e’gl da vaser surtut paraglischs da tutas furmas a gràndeztgas. Egn balteztgas tgapetsch da cazolas â la furma da figlia mantunada. Cur c’igl atun stgirainti la valada, vigni ella ravidada da stgafir paraglischs.

La «cuntantientscha» giapunesa

La tearza agl ravugl e Christine Faig c’abitescha da 13 ons annà par part a Pignia ad a Baden, noua c’ella â egn atelier par far porzelana. Ear l’anteriura miedia â egna relaziùn cun la Val Schons da la si’unfànza annà graztga a sieus bab c’eara ear sto miedi an la valada. Ella expona scadealas, cupas a figuregnas da porzelana caluradas cun la tecnica da raku. «Raku» munti «cuntantientscha» a vegi igl sieus origin an la tradiziùn digl te digl Giapùn. Mo raku e ear egna tecnica speziala da burnir vascheala d’arscheglia. Cur c’ella e bugliainta cotschna vean ella prida ord igl furn a messa an rasgem. Ascheia vean ella scurvanada malregularmeing. La calur para sco flomas segls objects a la glasura sfardantada da schnadetg survean schlupadiras. «Quegl efect dependa adigna da la casualitad, mo igl resultat nunprevieu darasa cuntantientscha», concluda Christine Faig. Sco quel da l’exposiziùn anzuma.