Leds da mintgina e mintgin che fa pumpiers

«Ei brischa e negin vegn! Quella situaziun lein nus evitar e per quei motiv drovan ils pumpiers Tei. Eis Ti in um ni ina dunna dall’annada 2004 ni pli vegl/ia e lavuras bugen el team?» Cun quei textin el Fegl ufficial dalla Surselva ha il Corp da pumpiers Sumvitg-Trun envidau dacuort giuvnas dunnas e giuvens umens ad in’orientaziun. Igl ei stau la tiarza ga ils davos onns che la direcziun dil corp ei sedecidida d’ir quella via e sco quei ch’il cumandant Roger Keller di, ei quei reussiu: «Da 24 dunnas ed umens che nus havein plidentau ein endisch vegni all’orientaziun. Ils ulteriurs han schau perstgisar per in motiv ni l’auter.»

In uffeci d’honur

Il Corp da pumpiers Sumvitg-Trun ei leds e cuntents da mintgina e mintgin ch’ei promts d’ademplir quei survetsch a vischinas e vischins. «Igl ei noss’obligaziun da mirar che nus hagien sufficientamein glieud pil seracass. Nus essan buc ella situaziun sco autras vischnauncas che san selecziunar la glieud. Igl engaschi sco pumpiera ni pumpier ei bein in’obligaziun, mo quei survetsch duess esser in uffeci d’honur. Tgei dat ei pli bi che segidar cun carstgauns, animals, infrastructura ed ambient», puntuescha Roger Keller.

Garantir in diember sufficient da pumpiers seigi buc aschi sempel en connex cul svilup demografic e la munconza da plazzas da lavur che sforzi biaras giuvnas e biars giuvens da luvrar anoragiu ni schizun ella Bassa. Obligai da far pumpiers ellas vischnauncas da Trun e Sumvitg ein dunnas ed umens igl onn ch’els cumpleneschan 21 onn. Terminaus vegn il survetsch tenor igl artechel 7 dalla lescha da pumpiers cun 42 onns. «Persunalmein giavischel jeu dapli glieud giuvna che s’engascha ellas duas vischnauncas, seigi quei ellas uniuns, ils samaritans ni ils pumpiers», puntuescha Roger Keller.

70 dels fuss bien

Dapresent dumbra il Corp da pumpiers Sumvitg-Trun 66 commembers. «La fin digl onn calan otg. Jeu sun da buna speronza che nus sappien cumpensar quels cun novs», di il cumandant. Nov umens giuvens e duas dunnas giuvnas ein promts d’entrar el corp l’entschatta digl onn 2026. «La suletta cundiziun ei ussa aunc ina controlla tiel miedi», di Roger Keller ed accentuescha: «Legreivlamein ein era duas dunnas probablamein denter ils novs. En quei temps ch’jeu sun engaschaus tiels pumpiers a Sumvitg e Trun sai jeu buca seregurdar da haver giu dunnas el corp.» Roger Keller ei vegnius avon 16 onns sisum la Surselva. El habitescha cun sia famiglia a Disla e lavura tiella vischnaunca da Sumvitg: «Quei ei lu era il motiv ch’jeu sun engaschaus leu sco cumandant dils pumpiers dapi tschun onns.» Sco officier presta el denton era survetsch tiels Pumpiers Sursassiala. Roger Keller che ha 37 onns ha entschiet a far pumpiers ella Bassa cun 14 onns.

Ei drova era officiers

Sche tut va bein dumbra il Corp da pumpiers Sumvitg-Trun naven digl emprem da schaner 2026 rodund 70 pumpieras e pumpiers. Cun quei diember ei Roger Keller cuntents. Tuttina ha el fastedis: «Da siat officiers e siat meinagruppa calan treis officiers ed ina meinagruppa. Quels stuein nus remplazzar. Jeu sperel ch’ei detti danovamein glieud che seigi promta da sescolar en quella direcziun.» Cull’orientaziun per giuvnas e giuvens han ils responsabels pil corp vuliu mussar co il menaschi funcziuna, tgei baghetgs ed infrastructura che stat a disposiziun pil seracass. Seracass han las vischnauncas da Trun e Sumvitg ella media siat ni otg per onn.

Collaboraziun cun corps vischinonts

«Nus havein circa tuttina biars pumpiers a Trun sco a Sumvitg. En cass d’in seracass pli grond collaborein nus era culs dus corps vischinonts, quel da Sursassiala e quel da Breil», di Roger Keller. Sco tier autras vischnauncas lavuran era biars pumpiers da Sumvitg e Trun ordeifer, aschia ch’il diember da presents en vischnaunca ei limitaus duront il di. «Per quei motiv fussen nus era leds, sch’ina ni l’autra dunna da casa sedecidess pil survetsch da pumpiers. Bein enqualina savess esser spert sil plaz», di Roger Keller e declara: «Circa in tierz da tuts pumpiers ei il di ora absents dil liug, seigi pervia dalla lavur ni per exempel era en vacanzas.» Culs corps vischinonts vegn era organisau mintg’onn in exercezi dil cader quei che ha tenor Roger Keller era igl avantatg ch’ins empren d’enconuscher in l’auter. Mo lu era ch’ins sa co ils auters lavuran e tgei infrastructura che stat a disposiziun a lezs.