Melodeias or digl clavo
Anzemel cun l’Uniun Rumantscha Grischun Central a la Cuminànza Culturala Val Schons savieu crear igl cudeschet da tgànt «Canzùns par unfànts dad ier par oz». Las canzùns en par tudestg a rumàntsch cun vetier las notas par la flauta. La fegn da november e stada la vernissascha digl cudesch agl clavo Melchior ad Andeer – an cumadevla atmosfera cun bealas surpresas musicalas.
Igl vendargis sera las 17.00 digls 28 da november 2025 â sbrinzlo glisch or digl Clavo Melchior. Quel satgata veda la veia tras Andeer. Schigea c’igl e sto fred ordafora, eari tgoldet an la stala a la musica â anvido d’antrar. Davànt earan numnadameing saradunos igls musicànts Andrea Cantieni (flauta), Ruedi Staubli (flauta) a Christian Hassler cun la ghitara. Anturn els igls giasts c’en vagnieus a la vernissascha.
Colavuraziùn da pliras parsùnas
Veda las pares earan exponidas las ilustraziùns digl cudeschet «Canzùns par unfànts dad ier par oz» an beal roms da len. Suainter l’introducziùn musicala agl Clavo Melchior â Andrea Cantieni, igl parsura da Cuminànza Culturala Val Schons (CCVS), raquinto da l’ideia a da la creaziùn digl cudesch par unfànts: «Schigea ca jou ve gieu l’ideia da quel cudeschet, fuss quegl mena ieu da realisar tut sulet», â el intuno a la vernissascha. «Mo par furtuna â la Gierina Michael gieu imediatameing plascher veda la mia ideia ad â investieu blearas uras lavur par translatar a cureger las canzùns.»
Egna grànda part da la lavur â surprieu Reto Cantieni ca â rimno las notas par acumpagnear las canzùns cun la flauta. A Maria Crottogini-Melchior â lua creo las ilustraziùns tier las singulas canzùns. Quegl â ella fatg cun pulpier da seda. Mintga maletg digl cudesch e mess anzemel or da tocs da que pulpier da seda ca Maria Crottogini-Melchior â pizitgieu davent a màn. Ascheia e mintga ilustraziùn unica a mussa c’igl stotgi betga tut easser perfect – igls unfànts den ear ver la curascha da saspruvar an quella tecnica creativa, sco ca Maria Crottogini-Melchior â declaro leza sera. Ella â ear preparo igl layout digl cudesch c’e lua vagnieu stampo da la fatschenda Rizzi a Tusàn.
Lavur intensiva
Ear sch’igl e gartagieu bagn a la surmestra Gierina Michael, la vusch rumàntscha da la CCVS, da translatar las canzùns par rumàntsch, dat igl ear l’egna u l’otra strofa ca â ussa egn oter cuntegn. Ascheia e davanto or digl «Bruder Jakob» egna «onda Bigna», igl «Hänschen» va an l’America ad igl «Gionet» va ussa a Paris. Igl e greav da translatar construcziùns ca van an rema ad ân ànc la madema melodeia. Mo Gierina Michael gi: «La mi’part da la lavur e gnànc ple stada aschi greava, cun quegl c’igl Andrea Cantieni â luvro oravànt schi bagn.» Tutegna dat egn tal project bleara lavur a dovra parseverànza. Antschiet cun las ampremas preparaziùns ân igls raspunsavels da la CCVS l’antscheata digl on.
Surpresa musicala
Sen la mesa damiez igl Clavo Melchior en stos lujieus cudeschets da «Canzùns par unfànts dad ier par oz» par dar egn tgit a par cantar. Durànt ca Andrea Cantieni â raquinto da la creaziùn digl cudesch â’gl do trànteraint posas musicalas. Igls musicànts ân suno canzùns or digl cudeschet a solistas or digl publicum ân acumpagnieu els. Duas scularas da Gierina Michael ân canto las strofas rumàntschas avànt igl publicum atent. Aschi bi ân ellas canto c’igl eara prest don ca la canzùn e stada a fegn.
Mo co e Andrea Cantieni anzuma vagnieu sen l’ideia da crear egn cudesch da canzùns? Quella dumonda â el savieu raspunder speart: «Igls mieus bieadis ân nunadieu plascher da cantar canzùns d’unfànts! Cun quegl c’igl lungatg rumàntsch â grànda valeta par me, leva jou cumbinar quellas favealas – igl rumàntsch a tudestg – a rimnar las canzùns an egn cudesch. Ascheia san ear igls unfànts ca creschan sei an lungatg tudestg profitar digl noss cudeschet.»
Quegl e ussa gartagieu, igl cudesch e qua! Ear la vernissascha an atmosfera privada cun punsch tgòld a beala musica e sto egn bi suczess. A tgi sa, sch’igl dat anzacuras egna savund’ediziùn da «Canzùns par unfànts dad ier par oz».
Gust da leger dapli?