«Savess buca s’imaginar zatgei meglier»

«Surprender ina fatschenta sco nossa scrinaria ei cumbinau cun responsabladad per las collaboraturas ed ils collaboraturs. Mia finamira ei da cuntinuar cul menaschi che mes geniturs han mess en pei ils davos decennis. Jeu hai plascher ed anim d’astgar cuntinuar cun quel e savess buca s’imaginar zatgei meglier.» Quei di Adrian Flepp (31) che daventa meinafatschenta dalla Scrinaria Flepp SA a Mustér cull’entschatta da l’auter onn.

«Il mument constat»

Siu bab, Victor Flepp (62), ei satisfatgs che l’interpresa ch’occupa 15 collaboraturas e collaboraturs – da quei quater emprendists – ha ina successiun: «Igl ei secapescha ina situaziun confortabla da saver surdar il menaschi ad in fegl. Ei fa plascher da veser che la cuntinuaziun ei garantida. Per mei e mia dunna Denise constat il mument da far la surdada», di Victor Flepp. El vegn a restar el menaschi e formar la direcziun cun siu fegl Adrian Flepp e Ronny Zanin. Igl onn 1992 ha Victor Flepp surpriu la scrinaria da Roc Huonder. Treis onns pli tard ha el fusiunau siu menaschi cun quel d’Ignaz Flepp. Dapi 2001 ei Victor Flepp cumpleinamein sur sesez culla Scrinaria Flepp SA.

Plascher ed anim

«Cura ch’jeu hai fatg igl emprendissadi l’entschatta dils onns 1980 deva ei tschun scrinarias a Mustér. Sco ei vesa ora ussa, vegnin nus ad esser la suletta naven da l’auter onn», di Victor Flepp. La Scrinaria Flepp SA ha realisau in niev baghetg cun ina surfatscha da producziun da 1200 meters quadrats a Pignola sut Segnas igl onn 2012/13. Quei baghetg cun infrastructura moderna ha buca fatg ponderar duas ga il fegl Adrian Flepp da semetter els fastitgs da siu bab: «Nus essan drizzai en bein cun maschinas. Quei vul denton buca dir ch’ei seigi buca d’esser attents igl avegnir e da cumpletar quei parc sch’ei fa da basegns.»

Seperfecziunaus a Biel

Suenter igl emprendissadi da scrinari eis el seperfecziunaus, denter auter sco tecnicher da lenn a Biel. Leu ha el era scret in’interessanta lavur da diplom: «Jeu sun sefatschentaus dil tema ch’ei daventaus actuals tier nus ils davos onns, numnadamein tgei ch’ei vul dir surprender ina fatschenta. Jeu hai viu davos las culissas. Inschign e vuler surprender in menaschi ei ina caussa, l’autra ei la damonda finanziala.» La responsabladad per las collaboraturas ed ils collaboraturs stetti a cor ad el, di Adrian Flepp. Cun lavur qualitativa vegli el empalar il menaschi era igl avegnir.

Il temps semida

La Scrinaria Flepp SA che fa tuttas lavurs da scrinari e ch’ei sespecialisada silla construcziun da cuschinas, ei ida cul temps e vul era far quei igl avegnir. «Ils giavischs dalla clientella e dils architects daventan adina pli individuals. Parallelmein semidan era las pusseivladads dil material», constatescha Adrian Flepp. L’interpresa emprova da luvrar aschi stedi sco pusseivel cun lenn indigen, mo era pertuccont quel ei semidau bia ils davos onns. «Luvrar cun lenn indigen vul adina era dir saver retrer quel cheu e lu era magasinar ni sechentar. Leutier vegnan ils prezis persuenter. Oz eis ei aschia che la lavur giavischada sto vegnir fatga spert e per quei motiv resta pauc auter che da retrer ils products da lenn dalla Bassa», di Victor Flepp.

Negin vul lenn cun roma

Persuenter ei la paletta da specias da lenn giavischadas dalla clientella s’augmentada. Il stgein ha bein aunc sia posiziun enteifer quella paletta, mo pli e pli savens vegn nezegiau ruver, fau ni era larisch e schiember. «Oz vul praticamein negin pli in lenn cun bia roma. Quei ei era in dils criteris che sforza nus da retrer bia lenna dalla Bassa», di Adrian Flepp. Fetg individuals ein era ils giavischs per las cuvridas dallas cuschinas. Crap dallas pli differentas tiaras e colurs han remplazzau las semplas cuvridas da pli baul. Semidadas ein era las pusseivladads dil tractament dil lenn, surtut cun agid da differentas sorts d’ieli.

Il persunal – ina sfida

In’autra sfida actuala e probablamein era futura da menaschis da mistregns tradiziunals ei da recrutar persunal. «Remplazzar glieud che va en pensiun ei buca sempel. Ils scrinaris qualificai han pil pli gia ina plazza», di Adrian Flepp e Victor Flepp cumpletescha: «Pli baul stuevan ins esser leds e cuntents sch’ina scrinaria prendeva in emprendist. Oz ei quei auter, ils paucs che vulan ir en quella direcziun ein desiderai.»

La lavur ei interessanta

Per impedir da vegnir en pitgiras cun persunal scolescha la Scrinaria Flepp SA successivamein emprendistas ed emprendists. «Survegnir emprendists ei segiramein pli sempel sch’il menaschi ei endrizzaus bein e cun maschinas modernas. La lavur dalla scrinaria e dil scrinari ei aunc adina interessanta. Tier nus negin che fa la medema lavur pli che duas jamnas», di Adrian Flepp. El constatescha ch’il lenn ei el trend. Apparentamein survegn el puspei la posiziun tradiziunala da pli baul.