«Umans da Brinzauls meritan speranza»
Tuttas fracziuns stattan serradamain davos il credit da 50 milliuns francs per Brinzauls. Il mardi ha il Cussegl grond garantì la summa per pussibilitar a la populaziun da bandunar il vitg periclità. I sa tracta da dischlocaziuns voluntarias e preventivas.
«Ils umans da Brinzauls meritan speranza», ha ditg Julia Müller en num da la PS: «Nagin na duai stuair viver uschia.» Las evacuaziuns pretendian corporalmain sco psichicamain bler dals abitants e da las abitantas dal vitg periclità. Perquai sustegnia la fracziun da la PS il credit da 50 milliuns per ina dischlocaziun da Brinzauls.
Quai è stà il tenor da tuttas fracziuns. Cun 106 cunter 0 vuschs ed 1 abstenziun ha il Cussegl grond approvà il mardi il credit.
Intermediar segirezza
«Per mai ed era per mia fracziun na datti nagin dubi vi dal consentiment tar il credit», ha ditg Thomas Gort da la PPS. Il deputà è era president communal da Küblis che ha dapi intgins dis problems cun il provediment d’aua. La situaziun a Küblis na saja sa chapescha betg cumparegliabla cun Brinzauls. Ma entras questa experientscha chapeschia el meglier la situaziun intscherta dal vitg smanatschà.
«Il credit è in impurtant segn da solidaritad», ha ditg Reto Crameri dal Center che fa era part da la suprastanza d’Alvra. «I va era persuenter dad intermediar segirezza a la populaziun pertutgada.» La situaziun saja greva per las persunas evacuadas che na possian dapi passa in onn betg pli abitar en las atgnas quatter paraids.
Ir u restar – il dilemma
La probablamain pli gronda sfida per la populaziun da Brinzauls saja il dilemma, ha ditg cussegliera guvernativa Carmelia Maissen: «L’avanzament da drenaschas mussan in effect positiv.» Il moviment da la «bova vitg» sco da la «bova muntogna» sa calmia plaunet, quai sajan svilups positivs. Da l’autra vart mussia l’istorgia da Brinzauls era quant svelt che las ristgas sa midian mintgamai.
Il credit da 50 milliuns porschia als abitants interessads da Brinzauls la pussaivladad da dischlocar voluntariamain. Fin il settember passà sajan vegnidas fatgas 40 dumondas da dischlocaziun che pertutgian 45 bajetgs. Quai chaschunass custs da 65 fin 77 milliuns francs, ha explitgà la ministra d’infrastructura. La summa possia dentant anc sa midar, perquai ch’i na saja betg cler tge varianta da dischlocaziun ch’ils interessads giavischian e sche las assicuranzas surpiglian prestaziuns.
La Regenza partia perquai da quella ch’ils totalmain 55,6 milliuns bastian per il project da dischlocaziun, ha ditg Carmelia Maissen. Sch’i dovria dapli daners, dumondia la Regenza il Cussegl grond per in credit supplementar.
Repartiziun dals 55,6 milliuns francs
Ils custs totals da 55,6 milliuns francs sa repartan sco suonda:
50 milliuns pajan il Chantun e la Confederaziun. Quai fa 90 % dals custs.
5,6 milliuns paja la vischnanca d’Alvra. Quai fa 10 % dals custs.
Tenor messadi da la Regenza surpiglia la Confederaziun almain 35 % dals custs totals da tals projects. Sche l’index svizzer da pretschs da bajegiar avess da sa midar, vegn il credit adattà correspundentamain.
Gust da leger dapli?