Drags, pirats ed in cameleon
Finamira da siu project seigi da svegliar il plascher ed interess pil lungatg romontsch, motivescha Riccarda Camenisch. Quels gis presenta la Surselva Romontscha siu cudisch d’affons cul tetel «Camillo». La mussadra creativa da Laax ha inventau, scret ils texts ed illustrau la figura dil cameleon che va alla tscherca da sia atgna musica.
All’entschatta digl onn ha ella presentau il project e la figura, ed ussa ei il product sin meisa: Camillo, il cameleon. Vendergis vegn l’editura, la Surselva Romontscha, a presentar il cudisch da Riccarda Camenisch. Ella ei carschida si a Laax ed instruescha dapi biars onns alla scoletta. Sco quei ch’ella ha getg en in discuors culla FMR muncavi ad ella adina canzuns actualas e tenor temas e stagiuns. Aschia hagi ella produciu sezza quei che muncava e gl’arcun persunal da canzuns seigi s’emplenius.
Surselva Romontscha ei editura
Cuntinuadamein hagien ins intimau ella d’edir in cudisch cul material. Producir in cudisch ei cumbinaus cun gronds cuosts e rescas finanzialas. Cu la mussadra ha inoltrau alla Surselva Romontscha – nunligiontamein – il project da Camillo ha ella udiu gitg nuot. Lu ha l’organisaziun denton decidiu da realisar, ensemen cun Riccarda Camenisch ed il producent da musica Manfred Zazzi, in cudisch cun 14 canzuns. Il fevrer 2025 ha Riccarda Camenisch presentau siu project alla radunonza generala dalla Surselva Romontscha.
Sin 80 paginas san ins ussa mirar e tedlar l’aventura dil cameleon Camillo. Tedlar las canzuns san ins cun agid d’in code QR. Cul telefonin ed in amplificatur mobil ei l’applicaziun fetg sempla ed accessibla a carschi ed affons.
La vernissascha da «Camillo» ei vendergis, ils 12 da december 2025, allas 18.00, a Laax, ell’aula dalla scola.
Gust da leger dapli?