Il datum da scadenza

Da temps en temps, cu jeu sun vida far las cumpras ni a ca mia vida far uorden ella frestgera ni ella scaffa-cuschina, sedamondel jeu: Con temps da veta hai jeu piars cun tschercar ils datums da consum e da scadenza sin products sco frina, nuschs mulai, pasta sfegliada ni groma ascha?

Sin mintga product sesanflan els en differents loghens: sil funs ni silla clamra ni sill’etichetta ni dalla vart ni tgisà nua. Ed els vesan ora adina differentamein: ner sin alv, ner sin plastic transparent, scret grond ni aschi pign ch’ins ha basegns d’ina lupa. Sezuppa forsa in’intenziun positiva davostier – per exempel da far duvrar la glieud in tec pli veglia – sco mei – siu entelletg mintgadi per ch’ella piardi buca sia forza intellectuala …?

Pigl auter less jeu aunc menziunar ch’ins anfla in datum da scadenza – e lez en in amen – sin products, nua ch’ins vess mai spitgau quei: p.ex. sin in schal fatgs cun crutsch ni sin ina bellezia vasa (omisdus datums scuvretgs en ina stizun a Glion).

In’autra damonda che fatschenta mei: Tgei fetsch jeu culs products cun ina data da scadenza ch’ei scadida? Stoi jeu better naven il jogurt? (Na, normalmein eis el buca schliats tochen silmeins in’jamna suenter il datum da consum.) Ni il zucher? (Na, ins sa aunc magliar el onns pli tard – respectivamein ins duess atgnamein consumar aschi pauc zucher sco pusseivel.) Ni il glatsch da vaniglia ella glatschera? (Na, ier ha miu um magliau in glatsch digl uost 2024 ed el viva aunc adina!) Ni il schal? (Na, dano sch’ins ha lavau el sin 100 grads.) Ni il pèsch? (Gie, magliar pèsch lavagau savess esser prigulus!).

Ei fa pia senn da stampar il datum da scadenza silla litgiva blaua. – Mo fagei schi bien: En in liug nua ch’ins anfla il datum, avon ch’il pèsch seigi buca pli buns.

Johanna Krapf è lectora ed autura e viva e lavura a Rapperswil ed Andiast. Ella ha emprais sursilvan e sa fatschenta intensivamain cun quella lingua.