La Vouta disch a revair – ma na amo dal tuot

La società La Vouta s’ha d’incuort drizzada per l’ultima jada cun lur newsletter «Post» a sias commembras e commembers. Fingià a sia ultima radunanza generala als 31 da mai 2025 vaiva la società da Lavin decis da’s schoglier. Cun quist pass ha La Vouta davo 28 ons e passa 300 occurrenzas culturalas serrà sias portas definitivmaing.

Sco cha la società scriva inavant gnia però realisà ün nouv proget illa müraglia da La Vouta a Lavin. Suot il titel «artinresidenza LaVin» han Rhea Schudel, Jasmin Hauser e Ladina Campell miss in chomma ün concept, chi prevezza d’organisar sogiuorns da duos fin trais eivnas per artistas ed artists da tuot ils geners d’art. Las iniziantas da quist proget vöglian eir in avegnir promouver l’art e la cultura a Lavin e s-chaffir ün lö d’inscunter per preschantaziuns, concerts, prelecziuns in connex culs sogiuorns artistics e’ls artists preschaints. «artinresidenza LaVin» vain pel mumaint amo finanzià culs ultims mezs finanzials da la società La Vouta. Qua d’eira eir gnü decis uschea a la radunanza generala quist mai.

Residenzas d’artists

La prüma residenza d’artist – chi d’eira pensada sco gir da prouva – ha fingià gnü lö insembel cul musicists e cumponist Ramon Landolt e l’architecta Caterina Viguera. Insembel han els lavurà vi da cumposiziuns e s-chaffi installaziuns cun material da tun, ch’els han registrà sün vadrets sco eir daspera e suot l’aua.

La seguonda residenza ha cumanzà als 24 da november 2025 e düra amo fin la mità december. Pel mumaint lavura a Lavin l’artista Annina Frehner vi da seis proget «Ahnen-Räume». Ella s’occupa vi da l’exaimpel da sia istorgia da famiglia cun dumondas da traumatisaziun in connex cun masüras repressivas per motivs da provedimaint in Svizra. Perquai invida Annina Frehner in venderdi, als 12 da december a las 17.15 ad ün discuors illa «Stalla» a Lavin, ingio ch’ella preschainta seis proget. In seguit vain servida üna schoppa, pan e vin.