Martina e Martins han mustgas

La «fracziun» dumbra diesch persunas – u pli precis: ina Martina e nov Martins. Puncto prenums èsi la pli ferma «fracziun» en il Cussegl grond. Vulan els puspè turnar en la proxima legislatura? La FMR ha tschentà la dumonda e survegnì tschintg respostas.

Il resultat da la pitschna retschertga: La motivaziun è fitg gronda. Quatter Martins ed ina Martina èn pronts dad ir en il cumbat electoral. La proxima stad, ils 14 da zercladur, elegia il Grischun ils 120 deputads e deputadas per l’avust 2026 fin l’avust 2030.

Martina Beeli – per il sectur da sanadad

«Jau hai decidì da puspè candidar», di Martina Beeli dal Center. «Impurtant per mai è il provediment da sanadad en las regiuns ch’jau ma less engaschar. Nus stuain lavurar ensemen en quest sectur cun il Chantun – era per esser fits e vegnir pli ferms encunter las pretensiuns e sfidas che vegnan da la Confederaziun.»

La finamira da la deputada e pura da Sagogn per la proxima legislatura è: purtar ils giavischs da sia regiun en il Cussegl grond, ma era collavurar bain cun autras regiuns.

Martin Sgier – sentir puls da la populaziun

Era Martin Sgier da la PPS less cuntinuar en il Cussegl grond. El fa dentant la resalva che sia partida n’haja anc betg fatg las nominaziuns en Surselva.

«Mia motivaziun da turnar en il Cussegl grond è segir ch’jau lavur era en la suprastanza communala da la Lumnezia», di il deputà e pur da Lumbrein. «Igl è in avantatg da savair tge che marscha sin palancà communal ed anc chantunal. Jau sent uschia il puls da la populaziun en la regiun ed enconusch era la politica chantunala.»

La finamira da Martin Sgier per l’avegnir è da s’engaschar per l’agricultura e per interess communals.

Martin Kreiliger – observar las finanzas

Martin Kreiliger da la PS è medemamain motivà da restar quatter onns dapli en la politica: «Cun la partida socialdemocrata pudain nus metter in accent ecologic e social.»

En il Cussegl grond hajan ins influenza e vegnia udì, di il deputà da la Cadi. «L’entschatta hai jau pensà che tut giaja plaun en in parlament, ma tar temas actuals che pertutgan nossa populaziun, pon ins propi tschentar accents.» Uschia saja per exempel vegnì cuntanschì dapli sustegn per las canortas u per las energias regenerablas.

Sia finamira per ils onns 2026-2030 è da tegnair en egl pli stagn las finanzas. En questa sessiun da december haja il Cussegl grond sbassà il pe da taglia – e quai anc avant ch’ins vesia l’effect dals ultims sbassaments da taglia, crititgescha Martin Kreiliger. I spetgian grondas sfidas finanzialas en il sectur da sanadad e puncto demografia. Quai dettia anc diras discussiuns.

Martin Binkert – traffic e vias da velo

Era Martin Binkert dal Center less turnar per ulteriurs quatter onns a Cuira. «En emprima lingia ma plascha il barat cun las autras regiuns e cun il chantun», di il deputà da l’Engiadin’Ota. En il Cussegl grond possia el far enconuschent la vista da l’Engiadina, che saja in pau diversa da quella dal rest dal chantun.

Sia finamira è dad observar vinavant la politica da traffic – cunzunt en vista a la situaziun en l’Engiadin’Ota. En pli haja el fatg ina intervenziun a favur da vias per velos, di manader tecnic da la plazza aviatica a Samedan. El veglia perquai observar sch’il Chantun procuria propi per meglras raits da velo.

Martin Butzerin – privilegi da far politica

Martin Butzerin da la PPS è dapi il 1994 – cun ina interrupziun da 12 onns – en il Cussegl grond ed el ha anc adina mustgas da far politica: «Jau hai decidì da candidar anc ina ultima giada.»

«Sco anteriur magister tutga la furmaziun tar mes temas», di il deputà dal Scanvetg che sesa en la cumissiun da furmaziun e cultura. En pli s’interesseschia el per l’agricultura, pertge ch’el gidia gia da pitschen si en il manaschi da sia famiglia.

Finamiras per la proxima legislatura na less el betg enumerar. En sasez s’interesseschia el per tut ils temas en la politica, di Martin Butzerin. «Igl è in privilegi dad esser en il Cussegl grond. Jau fatsch gugent politica e dapi ch’jau sun pensiunà hai jau era dapli temp per gliez.»