«Prevegnir al traffic da transit»
La vischnaunca da Mustér ha relaschau in scamond da carrar silla Via Cavardiras. Cun quella mesira ademplescha ella in giavisch dils vischins e dil commerci dil quatier. Lubius ei era igl avegnir in apport. Vul dir: Tiels menaschis pertuccai ed ils parcadis publics astga vegnir carrau senza restricziuns.
Strusch enzacu ha in scamond da carrar sin ina via caschunau tonta discussiun sco ils davos dis a Mustér. La vischnaunca ha numnadamein decretau in scamond per la Via Cavardiras. La via meina d’amiez il vitg engiuviars alla spartida dallas vias che meinan el quatier Davos Mustér, respectivamein en direcziun Carcarola.
Reducir il traffic
Avon rodund duas jamnas ein las tablas pil scamond da carrar cun vehichels a motor cull’indicaziun «survetsch d’apport lubiu» vegnidas montadas. Bein enqual vischina e vischin ei staus surprius da quei scamond ed ei sedumandaus, schebein in tal seigi veramein necessaris. «Cun quella mesira risguardein nus il giavisch inoltrau dils habitonts dil quatier e dil commerci da reducir il traffic sil necessari. Aschia duei la qualitad da viver vegnir augmentada», argumentescha il president communal René Epp il scamond.
Apport lubiu
La colligiaziun principala culs quatiers sut sappi succeder silla Via dalla Staziun che seigi destinada per quei traffic. «Ei setracta d’in scamond da carrar pil traffic motorisau. Igl ei impurtont da risguardar l’amplificaziun survetsch d’apport lubiu. Aschia san ils habitonts dil quatier ni quellas persunas che fan diever dil commerci, respectiv dallas ustrias el quatier nezegiar la via era il futur», di il president communal. Medemamein seigi ei pusseivel da far vinavon diever dil parcadi public en quei perimeter. En quei quatier sesanfla numnadamein la Casa da parcadi Central.
La classificaziun resta
Sco quei che René Epp ha detg sin damonda dalla FMR, resta la classificaziun dalla via la medema sco entochen dacheu: «Tenor la lescha davart la planisaziun dil territori munta la cumpart dall’interessenza publica tier in’eventuala sanaziun entochen a 30 %. La suprastonza communala decida davart l’interessenza publica mintgamai el rom dalla procedura da contribuziun. Era en connex cul survetsch d’unviern mida ei nuot pils proprietaris da schischom.»
Daco buca mo en ina direcziun?
La varianta da lubir il traffic sulettamein sin ina vart – sco igl ei il cass era en autras vischnauncas, nua ch’il vial lubescha buca da cruschar – ei buca vegnida en damonda per la vischnaunca. «L’intenziun ei da prevegnir al traffic da transit sin quella via. Traffic en ina direcziun promova e canalisescha aunc pli fetg il traffic. Quei ei buc il senn e quei promovess schizun la spertadad, cunquei ch’ei dat negin cuntertraffic. Per motivs da segirtad ei il traffic en ina direcziun buca vegnius tratgs en consideraziun», rispunda René Epp.
Pli baul via cantunala
La Via Cavardiras ei in dils pli vegls straduns el vitg a Mustér. Pli baul era ella schizun via cantunala. «Igl Uffeci da construcziun bassa dil cantun Grischun ha sanau la fin dils onns 1990 il tschancun naven dil sutpassadi dalla Viafier retica entochen alla Via Raveras. Silsuenter ei vegniu fatg sanaziuns en pliras etappas ils onns 2016 entochen 2023 sil tschancun naven dalla Via Raveras entochen ella fracziun da Cavardiras», di René Epp sin damonda. Igl onn 2024 hagi il Cantun allura surdau la part restonta dalla Via Cavardiras – senza il tschancun gia brattaus igl onn 2000 – inclusiv la Via dalla Staziun alla vischnaunca.
Gust da leger dapli?