Carmina Burana a Scuol ed in America

«Nus lain eir profitar da l’affar d’advent. Ün bigliet dals concerts da Carmina Burana in gün a Scuol es nempe ün bel regal da Nadal», disch Andrea Matossi, president da la società Scuol Classics. Ils concerts cul Golden Gate Symphony Orchestra and Chorus han lö da gövgia fin dumengia, ils 18 fin 21 da gün 2026 illa halla Gurlaina a Scuol. Mincha saira han plazza passa 1000 persunas als concerts da Carmina Burana a Scuol. Ouravant vegnan dats differents concerts i’ls cumüns e fracziuns da l’Engiadina Bassa. «Nus organisain quista jada ün Festival Scuol Classics chi düra bundant duos eivnas», quinta Andrea Matossi.

Annunzchar fin la fin da l’on

L’on passà ha Scuol Classics preschantà quatter jadas la Novavla sinfonia da Ludwig van Beethoven a Scuol. Eir quist proget es gnü realisà cul Golden Gate Symphony Orchestra da San Francisco, suot la direcziun dal Grischun Urs Leonhardt Steiner, chi viva plüs mais l’on a Scuol. El es emigrà avant passa 40 ons a San Francisco ed ha fundà in America il Golden Gate Symphony Orchestra. Sia idea es da gnir mincha duos ons cun seis orchester e seis cor in Svizra e da preschantar ün proget classic insembel cun musicistas e chantadurs da l’Engiadina respectivamaing dal Grischun.

Il cor regiunal per la cantata scenica da Carl Orff vain manada quista jada da Martin Zimmermann, chi ha diret blers ons il cor da la scoula media EMS Schiers, e da la musicista e chantadura indigena Cinzia Regensburger. Sco cha Andrea Matossi infuorma, s’han intant annunzchadas üna tschinquantina da chantaduras e chantadurs. Cha persunas e cors interessats possan s’annunzchar amo fin la fin da l’on. Tenor il president da Scuol Classics füssa flot da pudair collavurar cun ün cor da plü o main 80 persunas da tuot il Grischun. Integrà i’l proget da Carmina Burana vain, tenor Andrea Matossi, eir ün cor d’uffants da tuot la regiun. Ils organisaturs han pudü persvader eir al solist Chasper Curo Mani per Carmina Burana 2026. «Da Sara Bigna Janett nu vaina amo surgni la resposta definitiva. Nus eschan però landervia», disch Andrea Matossi.

Chanzuns rumantschas in America

Sper l’ouvra Carmina Burana vegnan preschantadas eir chanzuns rumantschas illa prüma part dal concert illa Halla Gurlaina a Scuol. Quellas chanzuns vegnan lura eir chantadas in America. Fingià dürant il mais mai han nempe lö differentas preschantaziuns eir a San Francisco, natüralmaing eir cul Golden Gate Symphony Orchestra and Chorus e cun üna gruppa da chantaduras e chantadurs dal Grischun. «Sco fingià l’ultima jada vaina differentas partecipantas e partecipants da l’Engiadina chi viagian in America per as partecipar al proget cumünaivel illa cità da port a la riva dal vest da l’America dal Nord», declera Andrea Matossi. Intant spera el da pudair vender fingià üna buna part da bigliets. «Quai motivescha per cuntinuar cun l’organisaziun», agiundscha’l.