Inaugurau las duas sutgeras novas

Sonda, in di da bellezia sillas muntognas, han las Pendicularas Andermatt Sedrun inaugurau festivamein ina investiziun ch’ellas han fatg el territori tuatschin. Suenter in temps da construcziun da sulettamein otg meins hagien ins saviu inaugurar ella Val Val duas modernas sutgeras da sis, scriva l’interpresa en sia communicaziun da medias. Ils novs implonts augmentan la capacitad da transport pil dubel sin 2400 persunas l’ura, ellas augmentien plinavon il comfort ed optimeschien la circulaziun dalla clientella. Sonda han las Pendicularas Andermatt Sedrun era saviu arver la stagiun d’unviern 2025/26. Per l’avertura ein representantas e representants dils partenaris participai, las autoritads e persunas responsablas dalla Andermatt-Sedrun Sport SA s’entupai alla fiasta d’inauguraziun. Ils Sunatibas Sedrun han introduciu musicalmein quella. Silsuenter ha il meinaproject Silvio Schmid ed il menader dalla producenta tytec SA solutions, Thomas Rentschs sco era Ignaz Zopp il manager dalla Andermatt-Sedrun Sport SA plidau e gl’avat da Mustér, il Tuatschin Vigeli Monn, ha benediu ils implonts.