Pei da taglia resta sin 65 %

Era la radunonza communala da Falera ha giu da prender decisiuns da basa pigl onn vegnent. Vendergis han ils da Falera decidiu unanimamein da schar il pei da taglia sin 65 % dalla taglia cantunala sempla. Era la quota dalla taglia sin schischom resta sco tochen dacheu sin 1.25 ‰. Il preventiv communal 2026 ha la suprastonza communala fatg sefundond sin quellas quotas da taglia. Pigl onn proxim quentan la vischnaunca da Falera cun in surpli d’entradas da 31’640 francs, quei tier expensas da 8’937’160 ed entradas da 8’968’800 francs. Il quen dallas investiziuns preveda in surpli d’expensas da 11’877’450 francs. Biebein 2 milliuns francs vegnan reservai per sanar las vias communalas. La summa gronda da 10 milliuns francs la participaziun alla Finanz Infra SA, la societad che cumpra ils implonts sil cuolm dallas Pendicularas Arena Alva. Ina summa da 500’000 francs impunda la vischnaunca da Falera pil center regiunal da sport Prau la Selva a Flem.

Ils da Falera ein d’accord culla revisiun parziala dils statuts e digl uorden da scola dil Consorzi Laax-Falera-Sagogn-Schluein. Unanimamein ha la radunonza communala approbau quei project. Ina ulteriura decisiun unanima pertucca la fundaziun dil Revier forestal Gonda cullas vischnauncas vischinontas Laax, Sagogn e Schluein. Il suveran ha approbau ils statuts corrispundents e concediu 68’950 francs sco capital da participaziun alla instituziun nova.