Per la scola el vitg

Ina tractanda che ha caschunau ina discussiun ei il project da reveder parzialmein ils statuts e gl’uorden dil Consorzi da scola Laax-Falera-Sagogn-Schluein. La radunonza communala da Sagogn ha refusau la proposta dalla suprastonza communala d’approbar la revisiun parziala dils statuts e digl uorden da scola. Opposiziun ha ei dau pervia dallas novas cumpetenzas dalla cumissiun da scola. Tenor la revisiun duei quella saver decider sch’ins partiziun da scola en in dils vitgs vegn serrada. Ils statuts e gl’uorden dat alla cumissiun da scola la cumpetenza d’adattar tenor situaziun il diember minimal d’affons ch’ei drova per menar la scoletta e las classas bassas en mintga vitg. L’ordinaziun cantunala definescha il diember minimal d’ina partiziun da scola per regla sin tschun affons.

Unanim pil Revier forestal Gonda

Suenter las elecziuns substitutivas dils 23 d’october 2025 ei la suprastonza communala puspei cumpletta. Da niev meina Richard Jezler il ressort dallas finanzas. Enteifer cuort temps ha el giu da preparar il preventiv 2026. La suprastonza planisescha expensas da 4’814’000 ed entradas da 4’818’000 francs, aschia duei seresultar in surpli d’entradas da 4’000 francs. Il quen dallas investiziuns planisescha expensas da 2’457’000 ed entradas da 700’000 francs. Unanimamein ha la radunonza approbau quei preventiv.

All’entschatta dalla radunonza ha il suveran da Sagogn giu da prender posiziun davart il project da sligiar il revier forestal Sagogn-Laax e da fundar in niev revier forestal cullas vischnauncas vischinontas. Unanimamein ha la radunonza approbau ils statuts dall’instituziun dil dretg public cul num Revier forestal Gonda e lubiu a quella in deposit da 82’355 francs sco capital da participaziun. La clav da repartiziun dallas quater vischnauncas sebasa silla surfatscha d’uaul totala ed il tagl annual. La vischnaunca da Laax ei participada cun 44,55 %, Sagogn cun 23,53 %, Falera cun 19,7 % e Schluein 12.22 %. Las singulas radunonzas communalas prendan quels gis la decisiun schebein l’organisaziun nova dil menaschi sa ir en vigur naven digl 1 da schaner 2026.

Plinavon ha la radunonza communala da Sagogn approbau ina damonda per in credit brut da 3,855 milliuns francs per sanar las vias communalas Fanaus, Sut Cresta, Fanaus sura, Taviarna e Carcaloras. Il project ch’ei suttamess alla procedura da perimeter entscheiva primavera proxima e s’extenda tochen gl’onn 2028.