«Quest unviern ha Livigno prioritad»

Grischun Vacanzas organisescha periodicamein en differents loghens discuors moderai ch’ins sa suandar cul telefonin via «livestream». In tal «Chat Box::discuors cultural» han ins registrau gievgia sera ell’ustria Ella. Bia glieud ha tedlau live la paterlada culla moderatura engiadinesa Annina Campell. Quella ha priu sil podi duas persunalitads da Flem. In d’els vala sco idol e visiunari dil turissem da skis. La moderatura ha beneventau Reto Gurtner e titulau el sco «Laax Papst Himself». Il president dalla Gruppa Arena Alva ha cumpleniu 70 onns, sesenta denton sco in giuven. Ses affons da 13 ed 11 onns tegnien si da frestg el, ha Gurtner schau valer.

Tutta peisa sils Giugs olimpics 2026

L’auter protogonist sil podi ei in idol el sport da skis freestyle. Annina Campell ha annunziau Andri Ragettli sco superstar, buca mo cun ses segls e saltos culs skis da freestyle, mobein era dallas medias socialas. Milliuns carstgauns mirien ses videos e suondien el sils differents canals. La moderatura ha vuliu saver daco ch’il sport da freestyle fascineschi talmein el. «Perquei ch’ins ei libers e buca ligiaus e limitaus vid portas e lingias», ha el rispundiu, ins sappi esser creativs, empruar sez quei tric e tschei salto.

Senza atgna dira disciplina funcziuni quei denton tuttina buc, ha il giuven da 27 onns schau valer. Quest unviern eis el la 12avla stagiun ella cuppa mundiala. Sia finamira ei clara: «Jeu mettel tutta peisa sill’Olimpiada 2026 ell’Italia», ha el puntuau. Quella ei il fevrer ella vischinonza dil Grischun. El Livigno Snow Park vul Andri Ragettli gudignar la medaglia d’aur, ina che maunca aunc en sia collecziun. El hagi aunc mai trenau schi intensiv sco uonn, ha el sincerau. Miez fevrer vul el contonscher sia finamira ed ir sisum il podest.

Bandischar ord Svizra

Reto Gurtner ha era tradiu sias ambiziuns, el ei semussaus pli filosofics. El vegli promover vinavon la veta reala, e buca l’imaginara tenor ils canals che promovan ils siemis. Ils affons dueigien ir cun skis e semover, ella vera neiv, ora el liber ed ell’aria frestga, e buca mo dar giugs en combra ed en stanzas serradas. «Atgnamein vulev’jeu tarmetter mes affons en ina claustra da shaolin, per ch’els emprendien d’enconuscher gl’emprem sesez», ha il visiunari turistic tradiu. Sia dunna seigi denton d’in auter meini en connex cull’educaziun, ha el aschuntau. Reto Gurtner ha tradiu als presents sia metoda da promover la cuntentienscha: «Mintga Svizra e mintga Svizzer bandischass jeu, sche quei fuss pusseivel, per in cert temps ord nossa tiara.» Aschia emprendessi la plipart d’appreziar il bi e bien che nus havein en Svizra, ha el motivau.

Capientscha pil nunusitau maunca

Andri Ragettli appreziescha las valurs e las libertads che nies sistem svizzer porscha. El respecta denton era las regulaziuns – nua che quellas ein necessarias. «Jeu astgel esser in exempel per auters, stoi denton dar adatg da buca profitar malgestamein da quei avantatg». El stoppi batter encunter sesez, e luvrar diramein cun empruar tschiens gadas tochen ch’il segl ed il tric seigien perfects e segirs. Duront il discuors cun Annina Campell ha el era tradiu in cumportament dils carstgauns ch’el capescha buc: «Schi prest che ti fas caussas nunusitadas, nunconformas ed innovativas, capescha il contuorn buca quei. Denton mo sche ti vas sin vias novas, porta quei vinavon tei». Andri Ragettli vul far quei cun empruar novas metodas, novs segls e creativitad el sport da freestyle.

Mintgaton fussi el leds sch’il svilup frenassi empau ed el savess ruassar, mo el sappi che gliez seigi nunpusseivel, il squetsch per innovaziuns e la concurrenza seigien presents permanentamein. Reto Gurtner s’encorscha quei el sectur turistic. «Sco interprendider stos ti adina mo batter ed empruar d’esser ordavon a tschels», ha el confirmau. Avon varga 40 onns ha el aviert il territori da skis da Laax pil sport da snowboard. Ir cun aissa ei daventau in cult. Aschia ei «Laax» daventau ina marca prestigiusa per la giuventetgna. Conservativs che han empruau da cumbatter quella revoluziun han stuiu capitular. Giuventetgna da tut ils continents mira oz sil Crap Sogn Gion, nua che la pli gronda mesapipa dil mund carmala da far segls e sesentir libers sco Shaun White ni Andri Ragettli.