Suveran approbescha revier Gonda

La suprastonza haveva proponiu da tener il pei da taglia sils 40 % dalla taglia cantunala sempla. Unanimamein ha la radunonza communala fixau quella quota pigl onn vegnent 2026. La decisiun ei colligiada cul preventiv digl onn proxim. Quel quenta – cul pei da taglia da 40 % – cun expensas da bunamein 23 milliuns francs cun in gudogn schuber da biebein 450’000 francs. La vischnaunca vul far gl’onn 2026 investiziuns ella valeta da 16,3 milliuns francs. Ina summa dad 1,0 milliuns francs ei reservada per l’emprema etappa dil center da cultura Sentupada e pil local multifuncziunal Spazi 500’000 francs. Pils projects da baghegiar habitaziuns per attempai ha la vischnaunca reservau il 2026 ina summa da 3,6 milliuns francs e per la sanaziun da vias communalas 4,8 milliuns francs.

Unanimamein ha la radunonza communala approbau il project da fundar il revier forestal Gonda cullas vischnauncas Falera, Sagogn e Schluein. Per quei intent ha la radunonza communala concediu la summa da 156’000 francs per separticipar agl institut dil dretg public. Dapi 2014 cultivescha il revier existent Sagogn-Laax era ils uauls dallas vischnauncas Falera e Schluein. Tenor il contract da fundaziun ed ils statuts dueien tuttas quater vischnauncas formar communablamein il revier niev Gonda. Las vischnauncas da Sagogn e Falera han era priu las decisiuns corrispundentas (mira las rubricas corrispundentas ella gasetta dad oz).