Vias communalas cuostan

Sco quei che la vischnaunca Lumnezia communichescha, ha il suveran approbau cun gronda maioritad il preventiv 2026 dil quen da gudogn e sperdita che preveda expensas da 19,3 ed entradas da 18,1 milliuns francs.

Il quen dallas investiziuns preveda expensas nettas da 3,7 milliuns francs. Las summas grondas pertuccan il ressort dil traffic. Sco quei ch’il preventiv indichescha, sanescha la vischnaunca denter auter la via communala a Surcasti e realisescha il passapei e las lingias da canalisaziun tras Lumbrein. Ell’economia publica vegnan 370’000 francs reservai per sanar il tetg dall’Alp S. Carli. Summas grondas drovan era la via da Vanescha a Vrin e la via d’uaul Ritta sur Tersnaus. La radunonza ha decidiu cun gronda maioritad da fixar il pei da taglia pil 2026 sin 90 % dalla taglia cantunala sempla. Ella ha concediu plinavon in credit supplementar da 55’000 per la quarta etappa dil project Via Resgia a Vattiz. La finala ha il suveran lumnezian concediu ad ina habitonta da Morissen il dretg da burgheisa dalla Lumnezia. Sut la tractanda varia ha il president communal informau denter auter, senza numnar motivs e detagls pervia dil secret d’uffeci, che la canzlista communala lavuri buca pli ell’administraziun communala a Vella.