Zieva l’inviern üna spüerta redütta

Propi concret nun es que intaunt amo cu cha’l provedimaint da sandet in Engiadin’Ota as preschantaro zieva la stagiun d’inviern – schabain cha als 5 da november vaiva la Fundaziun pel provedimaint da sandet Engiadin’Ota (SGO) annunzcho d’infurmer la mited da december insembel cun la Clinica Gut SA ed il Ospidel Chantunel davart lur plans pel futur da l’Ospidel Samedan. Ma impè d’üna infurmaziun detaglieda da tuot las instanzas invoutas, s’ho venderdi passo unicamaing la SGO drizzeda al public cun üna comunicaziun.   

«Que cha nus fains uossa i’ls prossems mais düra normelmaing püs ans», ho dit Selina Nicolay, la presidenta dal cussagl da la SGO, invers il Regionaljournal dal Radio SRF a reguard il plan da sanaziun per la SGO. «Nus lavurains cun ota pressiun vi d’üna soluziun.»

In sia comunicaziun da venderdi ho la SGO per la prüma vouta concretiso tscherts termins:  Ella prevezza da cuntinuer culla gestiun da las duos dmuras per attempos e culla spitex amo almain fin la fin da marz e da surder quella zieva ad ün’otra organisaziun purtedra. Eir per la gestiun da l’Ospidel Samedan resta fin la fin da marz  respunsabla la SGO.

Unanimited da las vschinaunchas a disposiziun

Scu cha’l provedimaint da sandet pudess guarder our pü concret a partir d’avrigl, que voul la SGO preschanter pü detaglio la fin da schner. Già poch pü tard stöglian las votantas e’ls votants illas vschinaunchas purtedras alura decider davart quel plan da sanaziun: u als 4 favrer in radunanza cumünela u als 8 marz a l’urna.

Fin uossa d’eira necessari ün SCHI da tuot las ündesch vschinaunchas purtedras per adattamaints i’l provedimaint da sandet – üna clausula chi ho impedieu la prümavaira passeda l’integraziun da l’Ospidel Samedan in l’Ospidel Chantunel. E chi ho principi november eir sepulieu l’idea d’üna cunvegna da prestaziun transitorica pels prossems duos ans amo avaunt cha tuot las vschinaunchas vaivan insomma vuscho davart quella (guarda eir boxa).

Invers RTR ho la presidenta da la SGO però dit in venderdi: «Nus pruvains tuot per piglier davent quista unanimited cha mincha cumün sto dir da schi. Cun quista nouva ledscha cha fains es que il böt numer ün.» 

«Consequenzas directas süllas plazzas da lavur»

Inavaunt scu fin uossa fin la fin da marz, fin cha la SGO es insolventa. Zieva dess tenor la SGO garantir la Fundaziun da l’ospidel chantunel il provedimaint da sandet zieva in Engiadin’Ota – adonta cha precis que nu vulaivan tschertas vschinaunchas avaunt ün mez an. La Fundaziun da l’ospidel chantunel es intaunt già preschainta in Engiadin’Ota cula Clinica Gut a San Murezzan e dess eir surpiglier da la SGO las partecipaziuns vi dal servezzan da salvamaint.

Il lö da l’ospidel actuel voul la Fundaziun da l’ospidel chantunel mantegner. Que ho almain dit il respunsabel per la comunicaziun da la SGO, Daniel Camenisch, invers la Posta Ladina. La SGO scriva in sia comunicaziun però eir cha «ün redimensiunamaint da la spüerta medicinela es indispensabla, cun consequenzas directas süllas plazzas da lavur». Dit pü cler: A daro üna reducziun da servezzans tar il provedimaint da sandet ed eir tar las plazzas da lavur.

Intaunt gira il mortori provisoric

Als 4 december ho il Güdisch regiunel da Malögia acconsenti a la dumanda da la SGO per ün moratori ed incumbenzo a la Girschweiler Partner SA da Stäfa i’l chantun Turich scu administratura dal moratori. Quel moratori – chi’d es intaunt acconsentieu provisoricamaing – garantescha a la SGO üna protecziun da las pretensiuns dals credituors e «do a la SGO temp per concretiser il plan da sanaziun e per trer las imsüras necessarias per garantir il provedimaint da sandet düraunt l’inviern», scriva la SGO.