Audas il temp?

Musica da chors taidl jau tut gugent. Ma schain uschia, per regla na procura il chant ussa betg per pel giaglina tar mai. Ma l’auter di m’è quai tuttenina capità, tadlond il Radio Rumantsch, ina dumengia damaun tranter las 09.00 e las 10.00. I vegn l’emissiun «Artg musical» e quella emetta gist parts dal concert da Nadal da la fin da november a Lugano cun il titel «Jeunes Talents Noël». Igl è in concert cuminaivel da quatter chors da giuvenils da l’entira Svizra. Tranter auter è er da la partida il Chor da giuvenils grischun sut la batgetta da Martin Zimmermann.

E gist quel chor chanta en sia part dal concert la chanzun «Heast es net», cun accumpagnament da l’accordeonista engiadinaisa Bigna Guler. Exact tar quella versiun da chor dal hit da Hubert von Goisern hai dà la pel giaglina. Cler, jau sun quasi vegnì vegl cun chanzuns dal musicist austriac, e «Heast es net» m’ha adina plaschì meglier che ses pli grond hit «Koa Hiatamadl» ch’ha chattà la via en mintga bar dad après-ski.

Insumma, per expertas ed experts da chors ed arranschaments è la chanzun «Heast es net» forsa plitost simpletta. In pau kitsch pensiv, ina ballada banala cun in text bunamain sarcastic: «N’audas betg co ch’il temp passa … ils giuvens èn vegnids vegls ed ils vegls èn gia morts.» – Ma insumma, la chanzun m’ha intimà da tadlar l’entira ediziun dal «Artg musical» dad RTR. E guarda qua, jau sun restà vidlonder cun ureglia attenta e stoss concluder: «Heast es net» è stà mo ina da pliras ivettas da quest concert da chors da giuvenils. I vala pia la paina da tadlar il «Artg musical» dals 14 da december 2025. Il concert «Jeunes Talents Noël» da Lugano è perfin vegnì registrà sco video ch’è er accessibel sin la pagina online dad RTR, tar l’emissiun «Artg musical».