Nadal – ediziun vischnanca

Ossa ans cattainsa puspe anmez igl bel taimp d’advent cun tot sias fassettas. A me plai chel taimp digl onn. La nateira ans dat avant tgi tot vign chiet e tgi ins po star a tgesa ed aveir cumadevel cun buna cunsienztga. Igls ples sa giaveischan pasch e taimp per belas tgossas durant igl taimp d’advent. Ma i vo betg adegna tot scu chegl tgi ins less. Ia va tignia en referat a mias mattatschas l’amprema dumengia d’advent cun vousch pansiva, scu tgi ia am met avant nossa convivenza durant las proximas emdas. Igls pleds «referat» e «reglas» von betg bagn a pro cun advent. Ia sa. Pero las «reglas» vevan nom: «pansar positiv», «ruschanar l’egna cun l’otra cun aveir igl proverbi – igl tung fò la canzung – ainten testa», e la regla impurtanta «esser tgeras l’egna cun l’otra». Ia saint gio a reir igls oters genitours. Tge illusiuns! Ma er ia less pansar positiv e crei fermamaintg vedlonder. Scu ve dalla naschientscha da Jesus.

Tant tar la pasch. Ma scu ègl cugl taimp? Taimp l’egn per l’oter, taimp per far momas u pang cun peira e per esser creativa. Ma er taimp per planisar ena bela festa da Nadal cun tot chegl tgi totga tiers. E cunzont er taimp per ena spassageda an pôss per lascher repassar igl onn ed er tschartger ainten sasez igls sentimaints tgi Nadal sveglia. Taimp per sa sfunsar ainten l’istorgia da Nadal e sies messadi.

Schi taimp e pasch èn noss angheligns sen ena spatla, schi tschaintan igls diaveligns stress e commerzi sen l’otra. Pi fitg tgi lagn betg tadlar sen els, e pi sonor e ferm tgi sbrigian ainten nossas ureglias. Nignsa digls ignorar? Noua tgi ins vo: bler traffic e gliout. Igls unfants on da far tant per la scola, uscheia tgi las seiras èn betg ple meditativas. E tgi è ansomma nia sen l’idea da stgaffeir en calender d’advent cun 31 portas? Ed ia sung anc stada uscheia en cucu tg’ia va cumpro da chels. Sainza leir, ma ia va fatg. Ea, i dovra tuttegna bler da tigneir pitg a tot chegl.

Igl mond savainsa betg midar. Ni la part da commerzi e «likes». E displaschevlamaintg er betg chella da povradad e misergia. Ma nous savagn ans focussar sen igls pitschens gests socials e cordials e far ensatge digl bung ainten igl noss conturn. Scu igl team tgi ò mess an peis ena nova buteia a Salouf – chapeu ed angraztg! Las donnas da l’uniun da donnas tgi on cuschino en stupent giantar per tot las senioras e seniors – amabel. Chel om tgi cuschigna gio onns vegn buglia per la seira da Son Niclo. E chella donna tgi fò spontanamaintg anc en pêr biscuits – cordial. Chella mamma tgi porscha en transport daple, per discarger en’otra. E chel vaschign tgi dumonda, schi ins vegia anc ensatge per «Davos Fallung» – social. Menziunar lessa er igl team tgi organisescha ena tschagna da Nadal a Parsonz per persungas sulettas – dacormaintg.

Forsa tgi chegl è igl tric. Ignorar igl grond e bler e sa focussar segl pitschen e rar. Er a tgesa cun mias reglas. Betg esser tresta tgi gartegia betg. Mabagn cuntainta tgi gartegia aglmanc eneda an de.

Sandra Baltermia-Guetg è administratoura e veiva cun sia famiglia segl agen bagn puril a Salouf.