«Sch’el guadogna, guadogn eir eu»
Ils duos frars Isai e Noe Näff da Sent fan passlung cun gronda paschiun. Daspö la stagiun passada toccan tuots duos pro’l cader B da Swiss Ski. Ün da lur böts da quista stagiun es fingià i in vigur: Els han das-chü partir a la cuorsa da la coppa mundiala chi’d es statta la fin d’eivna a Tavo. Avant las cuorsas s’han els tut temp per discuorrer culla FMR sur dal esser fradgliuns e concurrents al listess mumaint.
Cha passlung saja lur paschiun, e quai fingià da pitschen sü, dischan Isai e Noe Näff, ils duos frars da Sent, tuots duos al listess mumaint. Isai Näff cun l’annada 2005 as vaiva qualifichà l’on 2023 pel cader B. Noe Näff chi’d es duos ons plü vegl es stat bun da far il pass ün on plü tard ed es uossa daspö la stagiun passada eir i’l istess cader sco seis frar.
Eir scha tuots duos han fingià ramassà experienza a cuorsas internaziunalas, d’eira la partenza a la cuorsa da la coppa mundiala da la fin d’eivna passada a Tavo ün da lur böts da quista stagiun. Sur ils 10 kilometers stil liber a Tavo sun Isai e Noe Näff rivats sün las plazzas 80 ed 81.
FMR: Descrivai Vossa paschiun pel passlung.
Noe ed Isai Näff: Il passlung es per nus stat fingià da pitschen sü adüna alch bel ed alch grond, cha nus vain fat cun bap e mamma. Plü gronds cha nus eschan gnüts e daplü cha nus vain vis il passlung sco nos temp, il temp per laschar oura tuot e svödar e simplamaing eir per giodair la natüra.
Chenüna tecnica fais il plü gugent?
Noe Näff: Eu fetsch vairamaing gugent tuottas duos tecnicas, ma fin uossa n’ha eu gnü daplü success cul skating. Ma per ir e per trenar n’ha eu plü gugent la tecnica classica. Isai Näff: Eu fetsch eir plü gugent classic ed eu n’ha eir fin uossa gnü daplü success culla tecnica classica.
Uossa vais istess vis fingià ün pêr loipas in oters pajais – chenüna es Vossa loipa prediletta?
Noe Näff: Eu crai ch’eu possa discuorrer per nus tuots duos, sch’eu di ch’il plü jent giaina sülla loipa quia a chasa pro nus, da Sur En vers Scuol o eir vers Ramosch.
Che sun Voss böts per quista stagiun?
Noe Näff: Ün böt vaina sgür fingià ragiunt: nempe cha nus vain pudü ans partecipar a la coppa mundiala la fin d’eivna passada a Tavo. Il prossem böt es lura la partecipaziun als champiunadis mundials da la U23 in Norvegia. Ed eu crai cha nus tuots duos hajan eir ün pa aint il cheu ils gös olimpics.
Co esa dad esser a la partenza dad üna cuorsa da la coppa mundiala dals gronds?
Noe Näff: Eu crai cha quai es per nus tuots duos amo adüna alch fich special. Quai d’eira ün da noss sömmis, da pitschen sü. Cler cha l’agitaziun es sgür eir amo adüna qua. Ma cun mincha cuorsa cha nus fain e mincha jada cha nus pudain ir a la partenza vain quai meglder.
Co esa dad esser tant in viadi – adüna darcheu ün’otra cuorsa in ün oter pajais?
Noe Näff: Ma, il flot es cha nus eschan adüna insembel, istess ingio cha nus eschan. Nus nu vain ingün problem dad ir cun l’auto, nus pudain durmir bod dapertuot. Ed eir svolar es adüna darcheu captivant. E hai, da verer oters pajais ed oters lös es adüna bel. Ma cler, nus füssan minchatant eir gugent darcheu a chasa, perquai cha Isai ed eu eschan eir tuots duos fich gugent in patria.
Vais lura forsa temp dad esser a chasa sur Nadal e Büman?
Noe Näff: Quai dependa da stagiun a stagiun. Eir quista stagiun nu savain nus uossa amo precis, scha nus eschan a chasa o brich. Quai dependa eir adüna ün pa da las cuorsas. Però ils ultims duos ons eschna stats a chasa sur Nadal e vain eir festagià insembel, simplamaing be cun bap e mamma, cun nossa famiglia.
E scha e cur cha Vus vais liber, che fais lura il plü gugent?
Noe Näff: Scha nus vain üna jada temp, lura passantaina gugent temp cun noss collegas cun ir cul go-kart o cun ir a kino. Ed uschigliö faina eir gugent oters sports. E lura ans pigliaina eir fich gugent temp in settember per ir ün’eivna a chatscha.
Inavo pro Vossa professiun, il far passlung: Isai es gnü selecziunà fingià üna stagiun plü bod co Noe. D’eira quai ün problem o d’eira quai güsta bun, ch’ün da Vus duos ha fingià pudü far experienzas?
Noe Näff: Isai es duos ons plü giuven co eu ed el es rivà ün on avant mai aint il cader. Eu nu vez quai sgüra na in möd negativ. Quel on ch’el d’eira fingià aint i’l cader, n’ha eu eir pudü profitar, per exaimpel dal material ch’el vaiva survgni da Swiss Ski. Ed eu craj cha quai saja stat per mai ün grond sustegn. Eu m’ha lura eir pudü qualifichar pel cader. Ed uossa eschna sül listess nivel tuots duos, i’l cader B, e quai es fich flot.
Co esa tanter Vus, eschat plütöst concurrents o tgnais insembel sco fradgliuns?
Noe Näff: Dürant il training eschna plütöst concurrents, impustüt scha nus fain sprints ün cunter tschel, lura laina adüna verer chi chi’d es quel di plü svelt. Però eu craj cha quai ans fetscha eir gnir plü ferms – adüna quist morder ün cunter tschel. Ma dürant las cuorsas o dürant la stagiun nun ans vezzaina mai sco concurrents, dimpersè propa sco fradgliuns e collegas ed ans provain eir da güdar ün a tschel. E hai, sch’el guadogna, lura guadogn eir eu e viceversa precis istess.
Gust da leger dapli?