Infurmaziùn davart las aclas

La sera d’infurmaziùn davart las aclas Cresta a Starlera e vagnida organisada digl vaschinadi da las Fareras a da la rapreschantànza digls possessurs da las aclas. Radunos en stos la fegn da november abitànts, suprastànts, igls cumembers da la cumissiùn da gestiùn, quels da la cumissiùn turistica a perits da la Scola òlta turitgesa per szienzas aplitgeadas (ZHAW). La fegnamira e stada da procurar ca tuts igls partutgieus disponian da las mademas infurmaziùns, da preschantar la situaziùn da partenza da maniera transparainta a da raschunar sur digls proxim pass. D’interess spezial en stos igls temas davart igl tractamaint egual da tut las aclas, dumondas davart l’infrastructura sco ear la dumonda digl antretschamaint da quellas agl project turist curaint.

Muntada istorica a culturala da las aclas

A l’antscheata â la suprastànza rancunaschieu la muntada istorica a culturala da quellas aclas. Igls partizipànts ân exprimieu stema pigl fatg, ca la suprastànza prendi daratschiert igl passo istoric da quellas duas culegnas muntagnardas ad anseari ellas acrivameing an las sias ponderaziùns partutgànt igl svilup futur.

Zund stimo e vagnida la perspectiva ca Cresta a Farera vignian antretschieus agl conzept turistic. La ZHAW â preschanto igl project ad explitgieu pussevla furmas da la cun­lavur an luvratoris, questiunadas a pass da lavur cuminevels. Igls preschaints ân musso an general lur pronteztga da sapartizipar, aczentuànd igl madem tains ear igl giavisch da vagnir a saver clerameing la maniera a la dimensiùn da lur angaschamaint. La fegnamira e’gl peia da far egn raport ca dascriva masiras concretas a practicas, las qualas risguardan igls basegns d’amaduas aclas.

Igls possessurs da las aclas ân alura s’exprimieu an favur da sapartizipar digls custs par pigl mantegnamaint da l’infrastructura tanor parts, surtut an conex cun investiziùns ple gràndas. Igl e vagnieu signaliso egna partizipaziùn d’antoca 50 %, schinavànt ca las dumondas giuridicas vignan sclaridas cleras a netas, oravànttut quegl ca partutga igl provedimaint cun forza electrica a Starlera.

Mademameing grànda acordànza â cato la proposta da la suprastànza da laschar las aclas an la ret comunala d’infrastructura a da taxas. Quegl e la premissa par tractar tutegna tut las structuras comunalas.

Egn raport detaglieu sco proxim pass

La revisiùn da la planisaziùn locala previda vean cuntinuada pér suainter la realisaziùn ca las masiras da schurmetg saran fatgas. Tutegna de ussa vagnir elavurada cuminevlameing egna schliaziùn solida par las aclas. Vusch criticas ân sadrizo ancùnter l’ideia da la «cunvegna» partutgànt las aclas. Quella de ussa vagnir surluvrada ad actualisada d’egna grupa da lavur ca cunsista da possessurs d’aclas, da suprastànts comunals a cun sustegn giuridic.

Sco proxim pass vean la suprastànza a preschantar egn raport detaglieu par màns da la populaziùn. La fegnamira e’gl da catar lartg sustegn an la populaziùn par las schliaziùns a da cuntinuar igl prozess democratic da maniera transparenta agl rom democratic.