Las midadas han buca purtau fretg

La fin d’uost ha igl Indoor Sounds el Center Fontauna a Mustér – pli baul Indoor Festival – giu liug per la 13avla ga. 13 ch’ei en biaras culturas ina cefra da discletg ei lu era buca gest stada quella da cletg per las organisaturas ed ils organisaturs dil festival da musica. «Era quella ga havein nus buca giu il diember da visitadras e visitaders giavischau. Consequentamein havein nus decidiu la fin dall’jamna vargada da calar d’organisar igl Indoor Sounds», di Florian Zanin, il tgamun dil comite. Forsa ch’enzatgi auter emprovi zacu puspei d’arranschar zatgei semegliont ni en ina fuorma pli pintga. Quei stat denton scret ellas steilas, aschia ch’il festival ei historia.

Memia paucas entradas

«Pigl Indoor Sounds digl uost vargau havein nus giu in preventiv da 160 000 francs. Enstagl da 900 entradas sco budgetau, havein nus giu sulettamein 550 entradas pagadas. Aschia ei sedada ina sperdita da rodund 30 000 francs», explichescha Florian Zanin ch’ei staus diesch ga al tgamun dallas 13 ediziuns dil festival. Per cuvierer la gronda part da quei deficit han ils organisaturs era stuiu arranschar uonn in lotto. «Da principi sa ei gie buca esser ch’ins sto arranschar in event per cuvierer il deficit da l’auter event», di il cau dall’organisaziun e puntuescha: «La motivaziun da cuntinuar ei ussa definitivamein buca pli avon maun.» Spel recav dil lotto gidan aunc pintgas reservas a far meisa schubra avon che serrar definitivamein ils cudischs da quei arranschament. «A nos partenaris havein nus communicau nossa decisiun.»

«Jeu deploreschel la fin»

Florian Zanin ch’ei s’identificaus cumpleinamein sur tut ils onns cugl Indoor Festival respectivamein igl Indoor Sounds, deplorescha ch’ei dat ussa nuot auter che da calar cull’organisaziun da quel: «Ei marscha buca aschi bia ella regiun e per quei motiv sun jeu aunc adina dil meini ch’il basegns per in tal arranschament seigi avon maun.» Sco quei che Florian Zanin constatescha, ein ils cuosts generals per l’organisaziun d’in event da tala dimensiun carschi ils davos onns. Sper las gaschas per las formaziuns da musica ein era l’infrastructura e la tecnica cumbinadas cun considerabels cuosts: «La tecnica e las localitads ein necessarias. Procurar quellas mo per ina sera cun tutta lavur ch’ei dat d’endrizzar, fa era strusch senn, aschia che silmeins duas seras ein necessarias.» Tut auter che sempel seigi ei era da recaltgar mieds finanzials da sponsurs.

La viulta ei buca reussida

Culla finamira da dar ina viulta el senn positiv dil festival han ils organisaturs fatg quest onn pliras midadas. D’ina vart il niev num Indoor Sounds, da l’autra vart il termin. Quel ei vegnius spustaus dalla primavera sin la fin d’uost. Medemamein ei la direcziun musicala vegnida midada da rock e hip hop sin rock e pop. Per attrer dapli glieud als concerts el Center Fontauna ei vegnida tschercada ina collaboraziun cun Sedrun Mustér Turissem. L’organisaziun dil Bike Event Just Ride communablamein cull’IMBA, l’Associaziun internaziunala da mountainbike dalla Svizra, ha medemamein buca purtau fretg. «Igl ei semussau ch’igl interess per nossa purschida ei semplamein memia pigns, seigi igl uost ni sco pli baul la primavera», di Florian Zanin concludend.