Üna sairada cun blera ritmica e schlantsch

La Baselgia San Lurench a Sent es cuntschainta per sia fich buna acustica. Regula Ursprung da la Società d’Ütil public chi abita a Sent es respunsabla pels concerts ed organisescha quels cun agüdantas. Dumengia passada ha concertà Il Power Duo Jaccard-Ruosch cun amis musicants a Sent. Da la partida d’eiran Christina Jaccard (chant), David Ruosch (clavazin a cua e chant), Fridolin Blumer (gïun) ed Andreas Wettstein (battaria e chant). Christina Jaccard e David Ruosch nu s-chivischan ingün sacrifizi per crear programs da Gospel d’ota qualità. Eir quist on preschaintan els insembel cun lur musicants, chi sunan in diversas otras fuormaziuns, dals 14 november fin als 27 december in 18 differents lös in tuot la Svizra concerts cun buna ritmica e bler savair. Per lur program da quist on s’hana laschà inspirar da la cuntschainta chanzun da Louis Amstrong «What a Wonderful World».

Las chanzuns preschantadas a Sent han vivü impustüt da la vusch plaina d’expressiun e chargiada cun blera energia da Christina Jaccard e cun ün grondius terzet. David Ruosch es specialist da Boogie Woogie, Stride, Swing, Blues e Soul-Jazz. Insembel cun Christina Jaccard sun els gnüts undrats cul Swiss Jazz Award dal 2012.

Concert cun gronda expressiun

Fingià cun entrar in baselgia ha dat in ögl l’iglüminaziun speciala in diversas culurs e cun ün bös-chin da Nadal bain decorà. Il concert ha cumanzà cun üna chanzun solo da Christina Jaccard cun gronda expressiun adattada bainbod cun ün accumpognamaint festiv. Dürant üna bun’ura han las preschaintas ed ils preschaints e dudi chanzuns da Louis Armstrong, Billy Preston, Les McCann, Brook Benton, Mahalia Jackson ed oters plü. Tuot il concert d’eira buollà da Black Music in vair sen dal pled. Al principi sezzaivan audituras ed auditurs bain salda sün lur bancs, ma quai s’ha bainbod müdà in möd cha tuots d’eiran in movimaint cul cheu, cul chül e culs mans ed han giodü üna sairada implida cun blera ritmica e schlantsch.

Ils tocs nu sun gnüts preschantats in möd autentic, ma cun blera improvisaziun ed in möd fich spontan. «In America ed impustüt pro’ls umans da culur s-chüra esa evidaint chi’s po dir quai chi’s pensa e quai sün via, ma eir in baselgia. La libertà da pudair dir dad ot l’agen maniamaint. Quai nun es dapertuot sül muond uschea e quai es ün grond problem cha blers portan cun sai. Nöglia chi sto gnir zoppantà, nöglia ingio cha oters ston tegner nan lur cheu, e tuot las vuschs chi cuntradischan nu dudin nus.» Cun quists pled ha Christina Jaccard toc sül viv.

Preschantaziun dal concert

Sco ch’ella ha eir tradi as tratta da la 23avla jada ch’els van sün turnea. «Sper mai e David Ruosch chi’d es respunsabel pel program e pels arrandschamaints tocca üna jada Fridolin Blumer, ün dals meglders bassists ch’eu cugnuosch ed in tuot il temp cha nus fain musica insembel nun ha eu dudi dad el ün tun fos. Il plü giuven da nus es Andreas Wettstein, nos junior chi s’adatta fich bain a nossa musica e chi’d ha üna buna vusch quai cha per nus es important causa cha nus chantain sco cha Vus vais dudi eir in trais.» Tanteraint han ils trais instrumentalists eir sunà sainza chant ed han pudü muossar lur savair musical in möd impreschiunant. Las preschaintas ed ils preschaints han giodü ün’omogenità, üna simbiosa ed üna dinamica da vuschs ed instrumaints chi ha buollà üna sairada cuort avant Nadal. A la fin dal concert il toc cuntschaint «Amen» cha tuottas e tuots han chantà insembel cul quartet. Tuot ils tocs in lingua inglaisa cun excepziun dal toc in tudais-ch «Nein, meine Söhne geb’ich nicht» da Reinhard Mey.