Arver ina porta per sedescargar dils deivets

Far deivets ei pli probabel in bienton pli sempel che sedescargar dad els. Per persunas cun mudestas entradas survargan ils cuosts da viver sut circumstanzas igl agen preventiv. Forsa vegn aunc ina expensa supplementara vitier, aschia ch’ei tonscha tuttenina buca pli da pagar il quen da taglia ni la premia dalla cassa da malsauns. Ei dat diversas instituziuns sco per exempel ils uffecis socials regiunals ni era la Centrala grischuna da dunnas che porschan cussegl co manischar las finanzas per tener igl equiliber. Bettina Schiessel meina il post da cussegliaziun per damondas da deivets dalla Crusch Cotschna Svizra Grischun. Il post sustegn era persunas cun stentas finanzialas da sanar ils deivets. «Nus fagein quei cun in mandat da prestaziun dil Cantun.» Sanar ils deivets per ina persuna privata vul gir dad intermediar denter ella ed ils crediturs.

Nova perspectiva per debiturs

Quella sanaziun dils deivets privats ei gest in tema ella politica naziunala. Il Cussegl naziunal ha aviert la jamna vargada la porta legala per possibilitar da descargar sut certas circumstanzas ils debiturs dad in deivet restont per puspei anflar la via ella normalitad. Bettina Schiessel beneventa la soluziun politica e spera che quella anfli sustegn era el Cussegl dils stans. «Ina pusseivladad da sanar ils deivets exista gia uss.» La menadra dil post da cussegliaziun dalla Crusch Cotschna Svizra Grischun fa attent che sia instituziun elavuri cun las persunas pertuccadas in preventiv. «Muossa quei preventiv ina surpli finanzial che lubescha da restituir ils deivets sa la dertgira frenar la stumadira dalla paga e la sanaziun dils deivets ei pusseivla.»

Crediturs san bloccar

Ein las entradas denton memia mudestas per restituir tut ils deivets ord atgna forza ei ina sanaziun entochen uss buca pusseivla. «Buca pusseivla senza il consentiment da tut ils crediturs che ston desister dad ina part da lur dabiens», sco quei che Bettina Schiessel puntuescha. Anfla la nova soluziun il sustegn politic el Cussegl dils stans sa ina dertgira sut certas circumstanzas sfurzar ils crediturs da desister. Per Bettina Schiessel ina impurtonta mesira per porscher ad ina gruppa da persunas els deivets la perspectiva da puspei turnar ella normalitad e far part alla veta economica. «Senza quella perspectiva restan las persunas els deivets, lur paga vegn vinavon stumada e la pusseivladad da pagar egl avegnir la taglia e la premia dalla cassa da malsauns ord atgna forza ei prida.» La menadra dil post da cussegliaziun gi che las persunas els deivets vegnien accumpignadas duront treis onns e la dertgira decidi a lur favur sulet sch’ella vesi in svilup positiv e la pusseivladad da viver egl avegnir sin atgna comba. «Jeu manegiel che la soluziun digl accumpignament sur treis onns ei buna e sebasa sin nossas experienzas.»

Bettina Schiessel fa attent che la plipart dils crediturs ein igl Uffeci da taglia e las cassas da malsauns. «Cun quellas instituziuns havein nus ina buna collaboraziun ed anflein era soluziuns acceptablas per crediturs e debiturs.» Ella gi ch’ei detti adina puspei crediturs pli pigns che veglien buca desister. «Magari perquei ch’els enconuschan buc ils detagls ni ch’els ein da principi encunter.»  Giuventetgna drova sulet exepziunalmein il sustegn dil post da cussegliaziun dalla Crusch Cotschna Svizra Grischun per sanar deivets. «Ei setracta plitost da persunas sur 30 onns e spert ein era affons pertuccai dad ina situaziun finanziala precara», gi Bettina Schiessel.

Cussegls per la generaziun pli passada

Cussegls en caussa finanzas dat ei era dil post da cussegliaziun Surselva dalla Pro Senectute Surselva, sco quei ch’il menader dil post, Curdin Casaulta confirmescha. Cun damondas da deivets dalla vart da senioras e seniors eis el buca confruntraus. «La generaziun pli veglia ei disada da spargnar e jeu surstun con bein ch’els vegnan da manischar las finanzas per part sulettamein cun la renta da AVS.» Cussegl ei stedi tschercaus en connex cun ceder ni vender terren alla proxima generaziun. «Magari han senioras e seniors duvrau il capital dalla cassa da pensiun e vegnan sill’idea da tschentar la damonda per prestaziuns supplementaras.» Ina che vegn en quei cass per regla buc concedida, tonpli sche la facultad ei vegnida duvrada sur mesira, sco quei che Curdina Casaulta explichescha.