Buteia e café correspondan ossa agl taimp dad oz

La Furnareia ed igl Café Casparin a Savognin on ena lunga tradiziun. 116 onns dattigl chel travagl, tgi sa catta a Savognin agl Stradung, situo an en bung li. Visavi è la Mazlareia ­Peduzzi, en ulteriour travagl cun ena gronda e lunga tradiziun, ed er igl hotel Piz ­Mitgel è ena tgesa tgi dat gio decennis. Dasperas la Furnareia e Café Casparin sa catta igl biro da Turissem Savognin Beiva ed er l’administraziun da Savognin Pendicularas SA. Anfignen igl 2018 è igl travagl adegna sto an possess dalla famiglia Casparin. Chel onn ò igl affar mido proprietari e da nov on surpiglia chel definitivamaintg Daniele ed Heidi Forino-­Poltera. Cun success magna igl pêr igl menaschi e dasperas er anc las filialas a Casti e Valbella. Cun betg ple corresponder buteia e café agl taimp dad oz èn igls patrungs e possessours digl menaschi sa decidias da modernisar, renovar e sanar la buteia ed igl café.

Ple u manc angal interpresas indigenas

Igls 10 d’otgover 2025 on scumanzo las lavours da renovaziun e sanaziun e l’emda passada è stada la reavertura dalla nova buteia e digl café tg’ò retschet en vistgia pi frestg, pi cler, pi modern e pi ampernevel. Heidi Forino-Poltera ò detg anvers la FMR: «Ple u manc vainsa ­risguardo per la sanaziun e renovaziun angal interpresas indigenas u dalla regiun.» Per ella ed er pigl sies om seia chegl sto evident da surdar las lavours a mastirants indigens, els tgi seian digl reminent er clients. L’unica excepziun seia stada la firma Ladenbauer, tgi vegia projecto, concepi, surluvro ed andrizzo la nova buteia ed igl nov café. Chella interpresa seia spezialisada schi sa tracta da sanar u renovar buteias ed er er cafés.

Angal ple en salv

Anfignen ossa veva la furnareia l’atgna antrada e chegl era er igl cass tigl café. Damai davigl dus localitads cun dus differentas antradas. Ossa siva dalla renovaziun e sanaziun dattigl angal ple en salv principal cun buteia e café. Igl element central è tgi da nov è en self-service aint igl café, vot deir tgi vign betg ple sarvia agl plaz. Mintga giast ò d’eir sez alla bar u agl buffet per la consumaziun. La patrunga Heidi Forino-Poltera ò detg igl suandont: «Cun chella maseira è pussebel da spargner ena plazza da lavour.» Da cattar persunal vigna adegna pi grev e difficil, cun simplamaintg betg esser pussebel d’occupar las plazzas da lavour. Cun esser igl nov local avert ins vegia er ena miglra survista sen giasts digl café e sen clients dalla buteia. La buteia è da calour pi stgeira, schizont eleganta, scu igl buffet er. Igl café è da calour clera, amabla ed er plaschevla. Igl local para ad esser pi grond, er schi dat angal ple 40 plazs an pe da 60 plazs. Scu tgi totga tar en café modern dad oz mantga er betg ena schinumnada lounge, tgi dat anc daple ambiaint agl local. Da nov dattigl da mezde er en menu ed avert èn la furnareia ed igl café dallas 06.30 anfignen las 18.00.