Cu ils aunghels ein vegni sin tiara
Suenter las vacanzas d’atun han la scoletta e l’emprema tochen quarta classa da Sagogn entschiet cullas preparativas pil teater da Nadal. Margis sera ha in grond auditori astgau guder in’ura culs affons sin tribuna.
Liam, Clau e Mattia han beneventau il grond auditori ella halla plurivalenta a Sagogn. Els han fatg cuortas e buca schau spitgar culla producziun. Dalla vart dretga dalla tribuna ein ils aunghels e sogn Pieder seposiziunai. Culs perspectivs han els entschiet ad observar il cunfar dils carstgauns giu sin tiara sin tiara. Amiez la tribuna han ins viu la gronda truscha. «Tgei currem che quella glieud fa», han ils aunghels constattau e sogn Pieder ha era scurlau il tgau dalla hectica e dil sestrer ellas stizuns avon Nadal. En pliras scenas ein gruppas seformadas ed ils affons han saltau cun coreografia da pop e rock.
Vastas preparativas
Quei che era pli baul la regla, ei oz l’excepziun: Sin Nadal preparava pli baul mintga scola el vitg in giug ed envidava pign e grond alla presentaziun. Las preparativas s’udevan tiel program dalla scola, igl era empau in midament tiel mintgagi ellas classas. Oz pretenda in project da Nadal dapli d’in menaschi ch’ei reglaus stretg e concis. Il team d’ina scola ha strusch peda e sto esser motivaus d’integrar in tal project el program digl onn. La scola da Sagogn che includa la scoletta, l’emprema e secunda classa culs affons dil vitg, e la tiarza e quarta classa culs affons da Schluein e Sagogn, ha fatg quei. L’entschatta digl onn da scola 2025/26 ha il team d’instrucziun decidiu da porscher als affons l’experientscha d’in giug da Nadal.
Per las scolastas ed ils scolasts ei quei stau cumbinau cun vastas preparativas. Il resultat han ils 55 affons ed il team d’instrucziun presentau margis sera silla tribuna dalla halla plurivalenta. Ils affons havevan empriu texts, canzuns e coreografias da sault, fatg culissas, zambergiau e rimnau requisits. Cun inscenaziun, cant e musica han els mussau il teater «In siemi da Nadal». Il messadi ch’ils affons han dau agl auditori ha forsa accumpignau enqualin a casa. Ils carstgauns emblidan ni survesan la vera muntada da Nadal. Buca la gronda truscha ed il commerci, il currem ed ils schenghetgs, ei Nadal, mobein il truscal pign egl uaul, cullas lieurs, ils erizuns e la famiglia ch’ei serimnada entuorn el. En quei senn ha era il project culs affons da Sagogn e Schluein in effect persistent: Planisar ed esser creativs, gidar in l’auter e realisar communablamein ina finamira fa senn ed ha plan en in plan d’instrucziun. Il grond applaus ch’ils affons han retschiert per lur prestaziun, ha cumprovau quei.
Gust da leger dapli?