Finiastra d’advent per animar da s’entupar

Las requirentas ed ils requirents d’asil el center dalla Bellavista a Mustér derivan da differentas tiaras. Il mument ei la casa che porscha plaz a totalmein 60 persunas occupada relativamein bein cun persunas che tschercan in refugi lunsch naven da lur patria. Els ein da different lungatg ed era culturalmein sedifferenzieschan las dunnas e surtut ils umens che habiteschan leu.

Ils indigens ein s’interessai

Entgins dis il meins porscha la Crusch cotschna svizra dil Grischun cuorturiala allas cussadentas ed als cussadents dalla casa ch’era pli baul in hotel. Aschia ha l’instituziun che s’engascha sin differents secturs per la glieud el cantun Grischun era iniziau ed animau las requirentas ed ils requirents d’asil d’arver ina finiastra d’advent. Suenter 2024 ei quei stau la secunda ga. Scolaras e scolars dil gimnasi, dunnas, umens ed affons dil vitg ein vegni per mirar lur lavur presentada il gliendisdis sera. Rodund 30 persunas ein stadas presentas. En cumparegliaziun cugl onn vargau ei quei stau varga il dubel. La finiastra d’advent ch’ei da veser ussa el Bellavista ei ina d’entginas el contuorn.

Gidau a zambergiar

«Biaras e biars dils requirents d’asil san buca tgei ch’advent ei, damai ch’els derivan d’ina autra cultura. Nus havein empruau da declarar quei, biars han capiu e han lu era saviu daco che nus creein ina finiastra d’advent. Entgins eran gia cheu igl onn vargau, aschia ch’els han saviu igl intent da noss’acziun. Igl interess da separticipar e collaborar ei staus avon maun en mintga cass», di Salka Bucher dil project Connect dalla Crusch cotschna svizra dil Grischun. Il project Connect emprova da promover il contact denter ils fugitivs e la populaziun indigena. El ei ina part dil program d’integraziun dil cantun Grischun. «Per la finiastra d’advent havein nus formau steilas communablamein cun las requirentas ed ils requirents d’asil interessai», di Salka Bucher. Ensemen cun elements da glisch fan ellas ussa ina biala pareta la notg.

Passatemps mintga gliendisdis

El rom dil project Connect s’entaupa la Crusch cotschna svizra dil Grischun mintga gliendisdis cullas requirentas ed ils requirents d’asil a Mustér. «Nus mein a dar ballapei, a viandar ni essan era gia serendi culla pendiculara a Caischavedra. Mintga tierz gliendisdis dil meins havein nus il caffè da sentupada. Leu s’inscuntran fugitivas e fugitivs cun indigenas ed indigens. L’idea da Connect ei da scaffir pusseivladads che promovan il contact per che las requirentas ed ils requirents d’asil sappien sesentir bein cheu», di Salka Bucher. Per che quei seigi pusseivel survegnan els era regularmein instrucziun dil tudestg: «Nus stein denton er a disposiziun allas fugitivas ed als fugitivs per discuors persunals. Ellas ed els han adina puspei damondas pertuccont pusseivladads da sescolar ni semplamein era davart lur problems e la veta cheu tier nus.» Bein enqualina ed enqualin seigi era alla tscherca da lavur. «Nus constatein ch’ils pli biars luvrassen bugen», di Salka Bucher.