Nadal – cun tuts 300 sin tribuna

Il meinascola Marc Cathomas e treis affons dallas diversas partiziuns han beneventau ils presents. Cuort avon era la halla d’events a Flem s’emplenida tochen sil davos plaz. Cu la band, plazzada denter tribuna ed auditori, ha entschiet a sunar ein ils protagonists entrai en ina colonna che vuleva strusch calar. Gl’emprem ein ils giuvenils dil scalem superiur sepostai sisum la tribuna, suandai dils affons dallas classas primaras e quels dalla scoletta. Accumpignai da scolastas e scolasts, las dunnas dalla meisa da miezgi ed il pedel cun sia squadra. Era il cussegl da scola, ordavon la geraua da scola Sol-Brit Bonderer, ei separticipaus, al project da concert. Tuts ein s’uni en in grond chor.

En tut ils stils, legras e lomas

En tut ein varga 300 affons e carschi semess en posiziun. Gia la band ha garantiu in deletg exclusiv: Il scolast da musica Christian Müller ha sunau cun ses conmusicists Clau Maissen, Vito Cadonau e Rolf Caflisch. Sco davosa ei Flavia Walder, la dirigenta dil grond chor, entrada. Cun Christian Müller instruescha era ella musica als divers scalems dalla scola da Flem. Suenter il cuort beinvegni ei il chor vegnius en acziun e neginas moderaziuns han interrut il program. Canzuns d’advent e Nadal en tut ils stils, legras, ritmicas e lomas, han divertiu gl’auditori. En tut ha il chor cantau els lungatgs tudestg, romontsch ed engles. Sco sch’ei secapess da sesez, cun ina articulaziun surprendenta e buccas aviartas, ha il chor cantau la romontscha «Nadal ei cheu!» Igl ei ina plein slontsch cun text da Sidonia Caviezel: «Cu ti fredas la canella ed ils grassins…Cantein cun tun sonor, nies cant el vegn da cor» ed il refrain «Nadal ei cheu, schubidua, dab dab dubida.»

Prestaziun collectiva rinforza

Alla fin han la band ed il grond chor intunau il «Clara notg». La canzun classica da Nadal han lu tuts ella halla cantau communablamein per romontsch. Il meinascola Marc Cathomas era sepostaus ella retscha sisum. Amiez ils affons dil scalem superiur ha el cantau e gudiu l’experientscha dil concert communabel. La prestaziun collectiva ha gl’auditori lu era honorau suenter in’ura cun applaus sin peis. Ella halla han ins viu massa fatschas rientas e cuntentas. «Buca mo il concert sez, mobein gl’entir process tochen la presentaziun, ei stau enzatgei fetg special», ha il meinascola confirmau en discuors culla FMR. Il luvrar ensemen hagi rinforzau a moda clara il menaschi e la cuminonza, affons e carschi hagien collaborau, gidau in l’auter, priu risguard, spitgau, exercitau e cantau ensemen, ha Marc Cathomas resumau il project. «Quel vegn a resunar positivamein aunc ditg en nossa scola», ha el manegiau.