Glüm verda per las set abitaziuns in chasa da scoula

In occasiun da l’ultima radunanza cumünala d’ingon a Valsot han 71 votantas e votantas preschaints decis quist mardi saira davart divers progets. Il plü grond baccun, nempe ün credit da passa 4,364 milliuns francs, es gnü suottamiss a la populaziun per ün proget da renovar l’anteriura scoula a Ramosch e da tilla transfuormar in üna chasa d’abitar cun set abitaziuns per indigens.

Quista dumonda es gnüda acceptada cun 46 vuschs SCHI, 23 vusch NA e duos abstenziuns. «Üna gronda majorità, dimena duos terzs da las preschaintas e preschaints, s’ha decisa da sustgnair il proget. Quel credit vain però etappà in duos ons, ed es previs pels ons 2026 e 2027», disch Christian Poo, il manader da l’administraziun pro’l Cumün da Valsot.

Acceptà desch credits d’investiziun

Sch’üna da las nouvas set abitaziuns in l’anteriura chasa da scoula a Ramosch vain vendüda u brich, quai ha la suprastanza cumünala da Valsot amo laschà avert. Tenor Christian Poo as voul evaluar inavant l’opziun da la vendita e sclerir in ün prossem pass schi dess insomma interess da vart d’indigens per cumprar üna tala abitaziun, suot la cundiziun cha quellas restan adüna prümas abitaziuns. «Uossa vegnan però fingià üna vouta scrittas oura tuot las lavurs, uschea cha nus pudain bainbod eir cumanzar cun la fabrica. Id es previs da terminar il proget dürant l’on 2027», disch Christian Poo.

La radunanza cumünala da Valsot ha in mardi passà eir dat glüm verda a nouv ulteriurs credits per progets d’investiziun plü pitschens o plü gronds per l’on chi vain. Tanter oter as tratta d’ün nouv reservuar a Seraplana per 2,7 milliuns francs, da la sanaziun da la via da god Sclamischot – Ravitschals per 1,1 milliuns francs o d’ün nouv s-chodamaint per la sala polivalenta a Ramosch per 110 000 francs.

Chasper Cadonau es nouv suprastant cumünal

Implü haja eir dat üna elecziun per ün sez vacant in suprastanza cumünala. Quella elecziun ha stuvü gnir fatta perquai cha’l vicepresident cumünal Andri Cantieni ha demischiunà per la fin d’ingon. Candidaturas in scrit sun gnüdas resguardadas fin al di da la radunanza cumünala ed eir dürant la saira esa amo stat pussibel da propuoner ulteriuras candidatas o ulteriurs candidats.

I nun ha però dat ingün cumbat electoral, perquai chi’d es gnüda inoltrada be üna candidatura in scrit e quai duos eivnas ouravant. Il candidat, nempe l’architect Chasper Cadonau da Ramosch, es gnü elet e surpiglia la carica a partir da l’on chi vain fin la fin dal 2028.