Lectura Rumantscha

Tut il rument va a Trimmis, ma betg ensemen

Jau bit mes rument en in satg ed al port en in container. Ma tge schabegia suenter cun mes satg? Sche quel fiss en Engiadina Bassa, lura vegniss el transportà d’ina interpresa a Trimmis per brischar. E sch’el fiss en Val Müstair, arrivass el er a Trimmis, dentant cun in’autra interpresa. La regiun Engiadina Bassa/Val Müstair aveva planisà da transportar ensemen tut il rument. Ina evaluaziun ha dentant mussà che quai custass a las vischnancas da l’Engiadina Bassa dapli che transportar separamain. Il viadi sur il Pass dal Fuorn è simplamain memia lung.

«Per il rumantsch na sa mida nagut»

Il cusseglier naziunal grischun Roman Hug è in dals cumbattants per l’iniziativa «200 francs bastan». L’iniziativa federala ord la cuschina da sia partida PPS vul sbassar las taxas da medias. Tenor Roman Hug n’haja quella reducziun dentant naginas consequenzas per RTR e per il rumantsch. «Ils Rumantschs e las valladas talianas na pateschan betg da l’iniziativa.» La promoziun da la lingua saja francada en la constituziun. RTR vegn tenor Roman Hug vinavant ad exister e quai er a Cuira. Tar in GEA a l’iniziativa stuess la SRG SSR tenor el dentant reducir la purschida – «tagliar giu in pau grass» – surtut tar emissiuns che na correspundian betg al service public, sco che Roman Hug di en l’intervista.

Agid per sanar las finanzas

Il Parlament federal discuta actualmain da levgiar a persunas privatas cun gronds daivets da stuppar la rusna en la bursa. Il post da cussegliaziun da la Crusch Cotschna Sviz­ra Grischun beneventa ina tala midada. I dettia gia uss ina pussaivladad da sanar ils daivets, dentant be sche las entradas d’ina persuna cun daivets sajan grondas avunda, ch’i saja realistic da restituir ils daners. En tschels cas dentant betg, declera Bettina Schiessel da la Crusch Cotschna. Perquai fiss ina midada d’engrà.

A revair e bun divertiment cun la Lectura Rumantscha!