Servus. Grüezi. Hallo. – in podcast transalpin

Toni Vinzens/FMR

L’Austria, la Svizra e la Germania han inqual tratg cuminaivel. Betg mo geograficamain, mabain era linguisticamain èn els vischins ed ins ha il sentiment d’enconuscher bain in l’auter. Ma ils trais pajais cunfinants han era lur atgnadads ed èn rivals: laschar triumfar in skiunz austriac fa mal al cor sportiv svizzer e viceversa. E per ils dus pajais pli pitschens datti strusch insatge pli bel che da dumagnar il frar grond sin la plazza da ballape.

Che questa amur-odi dat da discutar, è pia evident. Ma ins po er emprender in da l’auter, sco ch’il podcast «Servus. ­Grüezi. Hallo.» da la gasetta Die Zeit mussa. En quel discuteschan il redactur svizzer Matthias Daum, il redactur austriac Florian ­Gasser ed il redactur tudestg Lenz Jacobsen davart actualitads en politica e cultura.

En l’episoda dals 10 da december 2025, «Radau im Unter­bau», han ils trais redacturs per exempel tractà cun in egl critic partidas giuvnas, en spezial ils Giuvens socialists en Svizra e lur relaziun cun la PS. En quest connex n’haja la partida-mamma numnadamain betg mo fatg buna parita durant las ultimas emnas, uschia il verdict dal redactur svizzer. Ma menziunada vegn en quella episoda era la Rumantschia cun ses pled da l’onn «IA» (intelligenza artifiziala). «Ils Rumantschs han entant era percurschì ch’i dettia ina IA», ha Matthias Daum commentà questa schelta.

Gea, ils trais redacturs pon inqual giada esser provocativs. Ma uschia procuran els per bun divertiment, e quai era grazia a lur rubricas «in Svizzer/Austriac/Tudestg ch’ins sto enconuscher» ed «ils Svizzers/Austriacs/Tudestgs – quels battan».