Zuoz oza i’l pè d’impostas per 15 %

Da stuvair uzer il pè d’impostas nu saro mê üna simpla decisiun per üna vschinauncha, ma la radunanza cumünela da Zuoz s’ho decisa quist marculdi saira da fer quel pass. Uscheja vela a partir da l’an chi vain ün pè d’impostas dad 80 % da l’imposta chantunela simpla ed es uscheja vain quel gnieu uzo per 15 %. Tenor üna comunicaziun da medias da la vschinauncha da Zuoz haun 66 abitantas ed abitants piglio part a la radunanza cumünela ed üna granda magiurited ho appruvo a la dumanda d’uzer il pè d’impostas.

I’ls prossems ans staun nempe diversas investiziuns pü grandas scu eir la conclusiun da progets grands sül plan da la vschinauncha da Zuoz. Però eir üna reducziun previsa da las impostas chantunelas ho motivo al cussagl cumünel da fer la proposta e d’augmanter il pè d’impostas.

Nouva s-chabellera Pizzet

Tenor il preventiv d’investiziuns 2026, chi prevezza investiziuns da passa 11,2 milliuns francs ed entredgias da 650 000 francs, resulta ün totel dad investiziuns nettas da passa 10,5 milliuns francs.

Il pü grand baccun es previs per la prüma etappa da la s-chabellera Cuort San Gian-Pizzet. Que’s tratta dad üna da trais s-chabelleras i’l territori da skis da Zuoz e quella stu gnir rimplazzeda causa cha la concessiun da l’implaunt scrouda zieva 20 ans per l’an 2026. Ad es previsa üna nouva s-chabellera sül medem traget, però cun s-chabelleras per quatter persunas invezza da be per trais scu fin uossa. Üna radunanza cumünela ho già quista sted la fin gün delibero ün credit transitoric da 10 milliuns francs per sustgnair quist proget da la possessura dal implaunts da skis, la «s-chabelleras e runels Zuoz SA».

In tuot investiziuns in passa 20 progets

In tuot sun previsas investiziuns in 24 progets pü pitschens e pü grands. Traunter oter vain termino il proget da la sanaziun cruscheda Resgia per 1,38 milliuns, a vain saneda la Via Surmulins per 1,46 milliuns francs, a vain fabricheda üna nouva lingia e separaziun d’ova ed innavaziun per 1 milliun francs ed ün mez milliun francs vain auncha investieu i’ls repars Albanas. Impü esa eir previs da realiser ün proget per s-chaffir ün’abitaziun per indigens i’l stabilimaint da la Posta veglia per 380 000 francs. Il quint dal preventiv 2026 prevezza sortidas ed entredgias da var 12 milliuns francs cun ün pitschen deficit da 23 906 francs. Tar las investiziuns sun resguardos progets chi sun già in cuorsa, già aderieus u propi necessaris. La radunanza cumünela ho accepto eir il preventiv 2026 cun granda magiurited.