Lectura Rumantscha

Puspè latg e paun a Sur

Nua vas ti a far tias cumpras? Anc en tes agen vitg u stos gia ir insanua auter a cumprar il latg ed il paun? Las abitantas ed ils abitants da Sur ston a partir da l’onn nov ir ordvart il vitg a far las cumissiuns. I pudess però bainbaud puspè dar ina butia en il vitg. Ina gruppa d’iniziants ed iniziantas vul a partir dal mars 2026 puspè avrir ina butia en il medem lieu sco da preschent. Cun in flyer vul ella eruir tge products che tutgan tenor la populaziun da Sur en ina tala butia. Jau schess latg e paun.

Pli paucs lieus da producziun e program

Sche jau hai be la mesadad en bursa, lura poss jau era be far la mesadad da las cumpras. Quai pudess bainbaud er esser il cas tar RTR. L’iniziativa da la PPS «200 francs bastan» smanatscha da smesar las taxas da medias. Per Flavio Bundi, schefredactur dad RTR, èsi cler, sche l’iniziativa vegniss approvada, fissi betg pli pussaivel da far il medem program en tuttas regiuns linguisticas da la Svizra ubain da mantegnair tut ils lieus da producziun. El na sa dentant betg dir quant fitg che RTR fiss pertutgà.

Persistenza era da Nadal

Da giuvna eri plitost in stuair finanzial dad ir sco studenta en la brocki, ozendi èsi in bel eveniment. Bleras brockis sa preschentan oz sco dretgs negozis e betg pli sco ina ramassada da rauba veglia, uschia era la Brocki Feschtland a Schluein. Per l’advent e Nadal porscha ella ruclas per il pignol da Nadal u autra rauba da decoraziun second-hand. Onn per onn vegni dapli glieud era en il temp d’advent a cumprar a moda persistenta en la brocki, ha ditg il manader da la brocki a Schluein.

La barriera da buna luna

Barrieras na procuran normalmain betg per buna luna, il cuntrari! A Scuol datti tenor noss redactur dentant ina che fa buna luna, almain en nov da diesch cas.

A revair e bun divertiment cun la Lectura Rumantscha!