Baghegiar cun miezmiur e miezutschi

Sto esser che la baselgia sontga Gialetta dad Andiast porscha in bien ambient da viver per miezmiur e miezutschi. L’architecta Marlene Gujan ha retschiert l’incarica dalla pleiv catolica-romana da Breil da planisar la sanaziun dalla baselgia. E l’architecta ha confirmau che silmeins duas sorts da miezmiur e miezutschi che valan per raras sesentan dacasa el suttetg dalla baselgia dad Andiast.

Sanar senza spuentar

Ei setracta digl aschinumnau plecotus (Langohrenfledermaus) ed dil rinolof grond che secasan mintgamai la primavera ella baselgia dad Andiast per trer si la nova descendenza. L’architecta tschontscha da biabein 30 animals e dad ina sfida da sanar il tetg dalla baselgia senza spuentar ils miezmiur e miezutschi ch’ein protegi. «Nus essan lundervi dad elavurar in concept cun las specialistas ed ils specialists da miezmiur e miezutschi per baghegiar e tuttina buca disturbar ils animals.» Marlene Gujan gi ch’ei seigi gia pervia dalla grondezia dil tetg necessari da sanar en etappas. «Segir vegnin nus a schar en ruaus la colonia la primavera cu lur descendenza nescha.»

In buordi per la pleiv

Cun ni senza miezmiur e miezutschi cuosta la sanaziun dalla baselgia sontga Gialetta ad Andiast 1,8 milliuns francs. Il president dalla pleiv catolica da Breil, Michel Brunner tschontscha en quei connex dad in pulit buordi. Quei malgrad che la regenza ha communicau la gievgia vargada da sustener la sanaziun cun ina summa da 223 610 francs. Michel Brunner gi che la pleiv sezza vegni a stuer purtar ina tiarza dils cuosts. «Nus fagein quei per gronda part cun in emprest bancar.» Vinavon quenta il president dalla pleiv da Breil cun contribuziuns dalla baselgia cantunala e dalla vischnaunca politica da Breil. «Nus essan denton dependents dacontribuziuns da fundaziuns ed instituziuns.»

Michel Brunner gi che la finanziaziun seigi aunc buca segirada. Tuttina quenta el da saver entscheiver a sanar la baselgia dad Andiast il zercladur 2026. «Nus entschevin, sche 70 % dils daners ein sin meisa.» Tenor las indicaziuns dil president dalla pleiv ei la sanaziun urgenta. «Il tetg ha en in liug ina sfendaglia e leu vegn en aua.» Bia ei buca vengniu fatg per mantener il sanctuari dad Andiast els decennis vargai. «Diversas lavurs han purtau dapli donn che gudogn», aschunta il president dalla pleiv.

Renovau e prolunghiu

Tenor las indicaziuns dalla Tgira da monuments dil cantun Grischun deriva la baslegia dad Andiast pli probabel digl 11avel tschentaner. «La baselgia ei vegnida renovada e prolunghida viers sidvest igl onn 1939.»

E tenor la communicaziun dalla gievgia vargada deriva igl altar el chor dalla anteriura baselgia parochiala da Boswil el cantun Argovia e datescha dils onns 1669 fin 1670. Per garantir l’existenza dil baghetg a liunga vesta ei la sanaziun indispensabla, scriva il Cantun en sia communicaziun.

Biars edifecis

Sanar ils agens edifecis ei daferton ina dallas incaricas principalas dalla pleiv, sco quei ch’il president Michel Brunner confirmescha. Avon paucs onns ha la pleiv catolica da Breil sanau per 1,3 milliuns francs la baselgia da Breil. «Sper las baselgias dils vitgs ha la pleiv aunc da mantener biabein 15 capluttas da diversa grondezia.» Sco quei che Michel Brunner gi, ha la pleiv sanau il 2023 la caplutta da Sogn Sievi a Breil. El quenta tuttavia che la pleiv hagi denton ruaus per diesch entochen 15 onns, sche la baselgia dad Andiast ei sanada.

Dad in tetg intact en lur domicil da stad han era ils miezmiur e miezutschi el surcombras dalla baselgia segiramein plascher. E sco quei ch’il Cantun ha communicau la gievgia vargada, vegnan la baselgia dad Andiast e siu contuorn era mess sut protecziun da monuments en connex cun la contribuziun dalla Tgira da monuments.