Il Grischun, ün eldorado dals criminals

Tschel di suna stat a Cuoira in libraria, n’ha guardà intuorn e daspö quai n’haja temma dad ir our d’chasa.

Ün roman criminal dasper l’oter e tuots dal Grischun. La Surselva fraida, l’Engiadin’Ota – s’inclegia cun tants esters bainstants. Ma eir ils indigens partecipeschan, l’Engiadina Bassa cun ils chatschaders, Cuoira, Tavo ed uschè inavant. I para bod cha mincha lö haja seis criminals, haja ün autur o üna autura chi sa descriver quels.

E sco chi para vegnan lets quists cudeschs, o almain vendüts. Sco chi para sun las lecturas ed ils lecturs persvas chi detta tants cas da greiva criminalità in Grischun. E perquai uossa mia temma da bandunar l’abitaziun. Eu ser la saira dublamaing.

Curiusamaing dorma listess dret bain. Il motiv per quai sarà cha cun tants romans nun hajan tut pro be la cifra dals criminals in Grischun, ma lura eir las pulizistas ed ils pulizists, ils inspecturs pro la pulizia, normalmaing sustgnüts tras privats chi crajan dad esser mez detectivs. E mincha detectiv ha alch in sia vita privata chi nun es normal. I’s po be cusgliar a la Pulizia chantunala da’s munir cun üna partiziun da psicologas e psicologs e da chüraders d’orma.

Il facit: Scrivai tantüna üna jada sur da la vita co ch’ella es in Grischun, ün cudesch sainza mordraretsch, be cullas solitas intrigas, cullas lumparias dal minchadi, co cha ün imbruoglia a l’oter, quai basta insè. E lura possa darcheu ir our d’chasa sainza avair temma – e laschar averta la porta!

Johannes Flury è stà reverenda e pli tard rectur a la Scola auta da pedagogia dal Grischun ed enfin la fin dal 2021 president da la Lia Rumantscha. El viva en il Partenz.