Pass curaschus da success
Ils responsabels dalla nova biblioteca da scola e communala dad Ilanz/Glion train ina buna bilanza digl emprem onn da menaschi egl edifeci renovau el Städtli da Glion. Sco ei ha num en ina communicaziun allas medias seigi ei reussiu da lantschar las dretgas occurrenzas e da contonscher ils amaturs da cudischs ed in publicum che passenta bugen temps ella nova biblioteca.
«Nus essan fetg cuntents cugl emprem onn da menaschi», di Caroline Gasser, la presidenta dalla cumissiun dalla nova biblioteca dad Ilanz/Glion. Sper las bunas frequenzas quotidianas hagien numerusas gruppas d’interessents visitau igl onn vargau la biblioteca, stat ei era scret ella communicaziun allas medias che la biblioteca ha fatg. «El decuors digl onn vargau havein nus astgau beneventar differentas gruppas ch’ein vegnidas era per mirar co l’anteriura Casa Arpagaus, ch’ei oz en possess dall’interpresa Immobiglias Schaub, SA ei vegnida renovada ed endrizzada sco biblioteca cun localitads per affons, giuvenils e carschi», di Caroline Gasser. Tenor la cumissiun ed il team dalla biblioteca ha ei era dau buns resuns dallas differentas occurrenzas per affons e per carschi che han giu liug ella nova biblioteca.
Dapli che mo emprestar
Per la biblioteca communala e da scola da Ilanz/Glion eis ei d’interess fundamental che la generaziun giuvna fetschi diever stedi dalla biblioteca. Silla pagina d’internet dalla biblioteca Ilanz/Glion san ins leger che gia avon gleiti 60 onns, cura ch’ins hagi discutau a Glion l’emprema gada davart il basegns per ina biblioteca cumplessiva, seigi ei vegniu detg duront ina sesida ch’ins sappi buca scumandar alla giuventetgna da s’occupar da schliata litteratura, sch’ins seigi buca el cass da porscher ad ella buna litteratura. Dapi igl onn 1967 ha ei dau detgas midadas.
El rom d’in project cantunal ch’ei adattaus al plan d’instrucziun 21 muossan las bibliotecaras dad Ilanz/Glion oz en in modul da scolaziun allas scolaras ed als scolars co ins enquera cudischs a moda digitala e co ins fa retschercas per anflar la litteratura giavischada. Caroline Gasser accentuescha: «Nossa nova biblioteca ei dapli che mo in liug d’emprest per cudischs. Igl ei oz surtut era in liug da passentar temps cun occurrenzas, da furmaziun e discuors.»
Open library cun bunas frequenzas
Caroline Gasser, ch’ei era vicepresidenta dalla vischnaunca dad Ilanz/Glion e che presidiescha en quella funcziun la cumissiun dalla biblioteca, fa era allusiun alla open library, la biblioteca ch’ei aviarta era ordeifer ils temps d’avertura. Cheu hagi ins registrau prest mintga di denter las siat la damaun e las nov la sera access da persunas che visetien la biblioteca cun la carta. «Ins sa prender e returnar cudischs ed ei dat era la pusseivladad da spitgar sin in termin en biblioteca. Ei dat era scolaras e scolars d’ordeifer Glion che passentan temps da spetga ella biblioteca. La biblioteca ei ina specia da stiva per amaturas ed amaturs da cudischs el marcau vegl da Glion.»
In premi dils bibliotecars
Cuort suenter l’avertura dalla nova biblioteca da Glion ha la presidenta Caroline Gasser astgau surprender a Vienna in premi per la biblioteca, quei el rom dil congress dils bibliotecars dalla Svizra, Austria e Tiaratudestga. Quei premi da persistenza seigi vegnius surdaus perquei ch’ins hagi vuliu mussar co ei seigi stau pusseivel d’integrar ina biblioteca en ina casa veglia renovada, di l’architecta da Glion. La Casa Arpagaus che consista da plirs edifecis dil 17avel e 18avel tschentaner ei vegnida sviluppada e restaurada dall’interpresa Immobiglias Schaub SA, ensemen cun il biro d’architectura Curschellas & Gasser e cul sustegn dalla Tgira da monuments dal Grischun.
Valiu la peina
Dapi biabein in onn vegn l’historia dalla Casa Arpagaus el marcau vegl da Glion raquintada vinavon sut il tetel «Biblioteca Ilanz/Glion». «Jeu saiel mo gratular allas deputadas ed als deputai dil parlament da Glion per lur curascha da dir GIE a sias uras al project dalla nova biblioteca», di Caroline Gasser che ha concepiu la renovaziun e che presidiescha actualmein la cumissiun da biblioteca ensemen culla parlamentaria Gierina Gabriel. «La casa ei vegnida biala ed emperneivla da star perquei ch’ella ha giu il sustegn ed in grond engaschament da biaras e biars, buc il davos era dil proprietari Immobiglias Schaub SA e da quels che han luvrau e realisau la renovaziun.»
Uniun per la promoziun
La lavur per la nova biblioteca a Glion ei tenor il team e la cumissiun da biblioteca aunc ditg buca finida. Sco proxim pass vuless ins installar ina uniun da promoturas e promoturs che realisass in program da communicaziun all’adressa da tut ils amitgs ed amaturs da cudischs. La presidenta dalla cumissiun di ei cun paucs plaids: «Tut quei che vegn purtau d’ordeifer en nossa biblioteca munta in grond sustegn. Igl ei sco tier ils clubs da sport ch’engrazian ina part da lur beinstar agl engaschament premurau da lur clubs da fans.»
Informaziuns datti silla pagina d’internet: www.bibliothek-ilanz-glion.ch
Ina stiva pils fans da cudischs
Suenter biebein igl emprem onn da menaschi trai la nova biblioteca communala e da scola el marcau vegl da Glion ina bilanza positiva dallas frequenzas. Biaras persunas han empristau cudischs ed era fatg diever dalla «Open Library» e biara glieud ei stada a mirar la nova biblioteca ch’ei vegnida aviarta la fin d’uost 2024. La suprastonta communala Caroline Gasser ch’ei copresidenta dalla cumissiun dalla biblioteca arvess bugen las portas per aunc dapliras visitadras e visitaders. «Nossa biblioteca ei ina specia da stiva per tuttas e tuts ch’ein amaturs da cudischs ed ein bugen en nossas localitads.»
Gust da leger dapli?