Resistenzas cun consequenzas
Cunter ils gös olimpics il favrer chi vain do que resistenza e que eir a Livigno. Ma critica publica in quista chosa nun es dal tuot simpla ed ün hom da 70 ans es perque gnieu arresto, perque ch’el posseda ün schluppet antiquo da sieu non.
Cha gös olimpics nu pisseran be causa la persistenza per grandas discussiuns es cuntschaint. Eir las fich grandas investiziuns in l’infrastructura surdimensiuneda cun grands cuosts da mantegnimaint sün dispüttaivlas – e pisseran tar mincha ediziun per chos cotschens.
Que nun es actuelmaing oter in vista als Gös Olimpics 2026, chi’d haun lö a Milano-Cortina cun occurrenzas a Livigno i’l favrer chi vain. Daspö ün pêr eivnas rendan transparents e placats – chi’s rechattan vi d’üna chesa immez la zona da peduns a Livigno – attent a püs puncts critics in connex culs gös. Quel edifizi, ün’anteriura pizzaria e chesa d’abiter, muossa impü i’l plaun terrain üna exposiziun cun divers artichels medials in connex cun gös olimpics e quaunt poch persistent cha quels sajan. Inizio ho quella il possessur da la chesa, Carlotto Bormolini, cun sustegn da sieu sochi Sevio Peri. Ma scu cha que pera, nun es resistenza ed opposiziun giavüscheda a Livigno e per Carlotto Bormolini ho sieu ingaschamaint gieu consequenzas pü grandas.
Da Livigno illa Vuclina davaunt tribunel
La pulizia ho nempe perquirieu l’exposiziun scu eir l’abitaziun privata dal possessur. I’l prüm plaun illas localiteds privatas es alura gnieu scuviert ün vegl schluppet, il quêl Carlotto Bormolini vaiva erto da sieu non. Quista scuvierta ho tenor sieu cumpagn Sevio Peri do andit a la pulizia d’arrester a Carlotto Bormolini. El saja in seguit gnieu mno giò la Vuclina per ün’interrogaziun.
Scu cha Sevio Peri ho quinto ad RTR, saja Carlotto Bormolini gnieu mno in marculdi passo davaunt il güdisch a Sondrio. La sentenzcha nun es però auncha cuntschainta. L’unic chi’d es gnieu comunicho es cha Carlotto Bormolini hegia survgnieu ün scumand da discuorrer cun la pressa e ch’el as stöglia adüna darcho annunzcher e’s musser giò’n Valtellina tar la pulizia.
Perche in scumand da discuorrer cun la pressa?
«Perche ho’l survgnieu ün scumand da discuorrer cun las medias, vivains in üna dictatura?», dumanda Sevio Peri ed agiundscha: «Que nun es pussibel cha qualchün nu po pü discuorrer cun la pressa. Que ho dal sgür be da chefer cun nossa exposiziun e critica.»
Tenor üna retschercha dad RTR, chi’d ho accumpagno a Sevio Peri sün üna spassageda tres Livigno, nu vulaiva üngün dals indigens piglier pusiziun in quist cas u s’exprimer critica in connex culs gös olimpics in möd public e invers la televisiun. Ma sülla spassageda ho diversa glieud gratulo a l’opponent e fat curaschi a Sevio Peri per s’ingascher inavaunt cunter ils gös olimpics. El disch: «Üngün oter nun ho il curaschi da dir qualchosa – ma eau fatsch inavaunt e nu dun sü. Eir scha d’he eir auncha dad ir in praschun.»
Da vart ufficiela nu’s lascha verificher quista istorgia, causa cha que as tratta auncha d’ün cas pendent, scriva RTR.
Gust da leger dapli?