Il bambin ei avon porta

Tenor l’historia biblica renviescha igl advent all’arrivada da Jesus Cristus. Da Nadal festivein nus la naschientscha dil bambin. Ils usits d’advent ein semidai fetg el decuors dils davos decennis. Sch’ins va tras las fieras d’advent opulentas san ins strusch crer che quei temps seigi staus inagada in temps dil far penetienza e gigina. Tenor il text biblic valeva igl advent antruras sco temps dalla preparaziun quieta silla gronda fiasta da Nadal. L’jamna vargada ei la FMR stada per via ed ha dumandau persunas davart lur plaschers e tgei che disturbi ellas vid il temps da Nadal. Ei suonda ina pintga schelta dalla retscherca en Surselva.

Monica Eusebio, Glion

Il scopo da Nadal ei per mei da seveser e passentar temps cun la famiglia, cun mes pli cars, cun quellas e quels ch’ein impurtonts per mei. Igl ei dis da reponderaziun, dil guder il temps e d’appreziar tut quei ch’jeu haiel survegniu. Jeu passentel Nadal cun mes affons, cun miu um e cun mes geniturs. Quei che disturba mei empau ei ch’ei vegn fatg grev ad ins da prender peda. E che tut sto ir aschi spert. E quei che dat era en egl ei il squetsch sil plaz da lavur avon Nadal. Tut sto aunc puder en e vegnir fatg. Sch’ins vul corrispunder dat quei ina gronda pressiun.

Jacob Cabernard, Glion

Nus essan empau cheu ed empau leu sur Nadal. Jeu mez sun pensiunaus ed haiel dus affons a Sogn Gagl. Nus mein tier els sur Nadal. Ed empau essan nus a casa e retschevein ils confamigliars che vivan a Cuera per far Nadal cun els a Glion. Il pli impurtont dalla fiasta da Nadal ei per mei la famiglia, d’haver peda in per l’auter. Cunquei ch’ils affons ein carschi e vivan en autras regiuns eis ei bi, sch’ins sa prender peda silmeins da Nadal. Per mei ei Nadal bi, sch’ei ha neiv. Il grond problem uonn ei che nus havein negina neiv. Schiglioc ei tut tip top.

Marinesa Candrian, Castrisch

Nadal ei per mei adina stau la tradiziun d’ornar il pigniel. Candeilas, ruclas en tuttas colurs ed aunghels han adina fascinau mei. Sin quei selegrel jeu era uonn. Epi eis ei bi cura che l’entira famiglia serimna sper il pigniel decorau. Nus essan buc aschi biars en nossa famiglia e perquei mein nus uonn tier mia niazza a festivar Nadal.

Stefan Frei

Ord il pugn da vesta dalla cardientscha cristiana eis ei clar tgei ch’ei schabegiau da Nadal. Igl affon Jesus ei naschius. Quei ei atgnamein in bi eventiment ed in biala situaziun. Nus astgein viver culla segirezia che nies Salvader ei vegnius sil mund e viva cun nus. Nus festivein Nadal en famiglia ed ella quietezia senza caneras e massa glieud. Quei ei bi. Jeu quetel ch’ei seigi donn che las fatschentas han ina aschi gronda impurtonza en quei temps. Ins emblida il ver senn da Nadal.

Martina Trippel,  Dardin

Per mei ei quei empau grev da dir. Jeu sun mai stada ina gronda adherenta da fiastas. Jeu passentel Nadal si Dardin cun mia famiglia. Quei inscunter ei il pli positiv vid la fiasta da Nadal. Tut la truscha cun stans e caneras drovel jeu buc. Jeu creigel era ch’ei vegni cumprau da Nadal memia bia e da quei che fagess buca da basegns.

Oswald Bürgi, Mustér

Sco cussegliader da viadi tier la Viafier Retica haiel jeu da luvrar sil spurtegl a Mustér da Nadal uonn. Dasperas quentel jeu denton fermamein ch’ei tonschi da far Nadal in mument cun mia famiglia. Igl ei era ina atmosfera speciala cheu tier la Retica quei di. Sche Vus dumandeis mei tgei che disturbi da Nadal, lu stoiel jeu dir ch’jeu hai breigias cun hecticas e dispetas quels dis che havessan da purtar la pasch. Nadal ei per mei ina fetg biala fiasta, mo Nadal stuess vegnir festivau tenor siu scopo.

Onna Turté Capaul, Tersnaus

Jeu sundel gia dapi biars onns persula e perquei selegrel jeu fetg da seveser cun mia famiglia e cun amitgas ed amitgs da Nadal. Da vigelgia da Nadal datti in inscunter cun amitgas ed amitgs ella Casa pervenda catolica a Glion ed ils 25 da december festivein nus en famiglia. Quei che dat da patertgar a mi mintg’onn ein las plunas regals da Nadal che vegnan fatgs mintg’onn. Tenor mei stuess quei buc esser. Da haver la pasch e vegnir perina en famiglia ils dis da Nadal ei tuttina bia pli impurtont, ni buc?

Anna Flepp, Rueun

Jeu selegrel fetg sin la sentupada da famiglia cun in bien gentar. Quei di vegnan tuttas e tuts, schiglioc duront igl onn ei quei buca pusseivel. Nus gudin Nadal cun in fondue chinoise ni bourguignonne epi stein nus ditg e liung da cumpignia. En nossa famiglia stat la cuminonza el center. Quei che disturba mei gia egl advent, mo surtut ils dis avon Nadal ei quella truscha stermentusa ellas stizuns. Jeu mezza eviteschel da far cumissiuns quels dis ni ch’jeu mondel en ina stiziun pintga, semplamein zanuas ch’ins vegn buca stuschaus hist e hot da cars da far cumissiuns.