Il pei da taglia resta sin 70 %

La gievgia sera ei la radunonza communala da Medel sefatschentada dils preventivs pigl onn 2026. Tuts treis – quel dall’Ovra electrica Medel, quel dalla vischnaunca e quel da Medel Turissem – ha ella approbau. Il preventiv dalla vischnaunca quenta cun in gudogn da 210 000 francs tier ina sviulta da rodund quater milliuns francs.

Investiziuns en manteniment

Il quen d’investiziuns preveda expensas da netto 580 000 francs. Las investiziuns principalas pertuccan la sanaziun dalla via d’uaul Lattas/Fuorns cun 150 000 francs. Per quella dat ei ina contribuziun cantunala da rodund 110 000 francs. Plinavon preveda la vischnaunca la cumpra da maschinas e vehichels pil forestalesser per 138 000 francs. Ellas lavineras a Crap Stagias eis ei previu d’investir 140 000 francs. Persuenter dat ei ina contribuziun cantunala da 112 000 francs. Il manteniment dalla casa communala ei budgetaus cun 350 000 francs.

Surpli d’expensas tier l’ovra electrica

Il budget dall’Ovra electrica Medel pigl onn 2026 quenta cun entradas ed expensas da rodund 1,75 milliuns francs ed in pign deficit da 6500 francs. Per investiziuns novas che vegnan activadas risguarda il preventiv in import da 250 000 francs. Cun in pign gudogn quenta il preventiv da Val Medel Turissem. Previdas ein entradas da 79 700 francs ed expensas da 77 540 francs, respectivamein in avanzament da 2160 francs.

Pei da taglia da 70 %

Sin proposta dalla suprastonza communala han vischinas e vischins decidiu da laschar il pei da taglia pigl onn 2026 sco entochen dacheu sin 70 % dalla taglia cantunala sempla. La taglia sin schischom resta sin 1,5 ‰. Sco la suprastonza communala scriva en ina communicaziun als mieds da massa, ha la radunonza communala acceptau la revisiun parziala dalla lescha da turissem sco era quella davart votaziuns ed elecziuns.