L’amprema ediziun è sen meisa

La gronda part dalla populaziun da Surses è catolica. I dat alloura dus cumegns-baselgia catolics. Chegl è igl cumegn-baselgia catolic Surses ed igl cumegn-baselgia catolic Savognin. President digl cumegn-baselgia catolic Surses, tgi reunescha diesch lis, è Clemens Poltera da Rona. Agl timung digl cumegn-baselgia Savognin stat Romeo Wasescha.

President digl cumegn-baselgia evangelic è Helmut Andres tgi stat a Parsonz. Alla suprastanza appartignan anc Alex Wettstein da Beiva, Rolf Marti da Cunter ed Edi Taverna da Savognin. Igls dus preditgants èn ser Matthias Eichrodt tgi stat a Beiva e è ser Thomas Widmer tgi stat a Farrera e segna scu substitut.

Anfignen quatter gedas per onn

Aint igl figl parochial evengelic da Beiva-Surses è da liger tgi cun plascheir preschainta la suprastanza digl cumegn-baselgia evangelic l’amprema ediziun digl figl parochial «RE-INFORMIERT». Scu tgi igl president digl cumegn-baselgia refurmo, Helmut Andres, screiva, duess igl figl parochial cumpareir treis anfignen quatter gedas ad onn. El duess er dar ena vista ainten l’activitad e la veta digl cumegn-baselgia evangelic. Igl cumegn-baselgia refurmo veiva er d’antupadas, da cuminanza, d’observaziun e da percepziun. L’activitad seia dètg gronda e chegl durant igl antier onn. Savens geian las activitads an amblidanza e gist perchegl fetscha igl figl parochial «RE-INFORMIERT» igl sies sarvetsch, screiva Helmut Andres. Ultra da chegl duess el er sarveir scu revista, scu angraztgamaint e scu invitaziun allas bleras occurrenzas.

Dall’amprema ediziun digl figl parochial digl cumegn-baselgia evangelic Beiva-Surses ins ò laschea stampar 500 tocs. Commembers e commembras digl cumegn-baselgia ins vegia 220, ò detg igl president Helmut Andres.

Cuminanza e speranza

Igls lectours e las lectouras, igls parochians e las parochianas duessan graztga agl figl parochial er neir infurmos ed infurmadas a taimp tge tgi corra e passa, seia chegl ecclesiasticamaintg e culturalmaintg. Cun esser infurmo pi bod allas occurrenzas ins viglia cugl figl parochial er animar vigl e gioven da sa participar allas occurrenzas. La baselgia duess davantar en li avert, en li tgi unescha carstgangs e lour orientaziun e tgi regala cuminanza e speranza, screiva igl president digl cumegn-baselgia evengelic Beiva-Surses.

Igl nom digl figl parochial «RE-INFORMIERT» tunga betg propi totalmaintg da nov. Sen camp cantunal ins canoscha igl figl parochial «Reformiert». Lò dattigl pero betg schi bler spazi pigls singuls cumegns-baselgia evangelics. Gist chella realitad è er stada ena raschung pigl cumegn-baselgia evangelic Beiva-Surses d’edeir en agen figl d’infurmaziun. Chel cumpeglia an tot 12 paginas cun bleras infurmaziuns ed indicaziuns d’occurrenzas betg angal religiousas, mabagn er da tot oter gener, seian chegl curs, referats e schizont films.

Sen la davosa pagina ins catta igls taimps digls cult divins e chegl davent digl december 2025 anfignen e cugl avregl 2026. Igls 14 da schaner 2026 ò per exaimpel li ainten l’anterioura sala communala da Cunter ena seira d’infurmaziun cugl tema: angaschamaint voluntari pigls asilants digl center da transit Scalotta a Marmorera. L’occurrenza ò li allas 19.00.